HARI GINI KERJA RODI

oleh : Oesman Ratmadja


 

       Ngedenger berita nyang ngenesin ati, KOMENG bukan aje kepengen nangis. Tapi juga kepengen banget mencet jerawat ples bisul si pengusaha nyang tega teganye ngerjain puluhan orang nyang dijadiin karyawan tapi sama sekali kagak diupah barang sepeserpun

      Bener - bener aneh tuh otak si pengusaha. Orang udeh ngeluarin tenaga,, udeh capek, jangan kate dikasih upah, Dikasihin pakean pengganti buat salin sehar hari  aje kagak. Bener bener tega tuh jiwa manusia. Padahal die ngeliat langsung - tahu persis, karyawannye nyang upahnye dibajak abis, kagak pernah salin. Kayak ape tuh baunya  kalau sekian lama cuma pakai pakean nyang terus menerus nempel di badan.

     "Lebih dari setan tuh orang," rutuk KOMENG nyang keselnye kagak ketulungan,makanye secara pribadi die berharap, pengusahe nyang kayak gitu, nyang mau numpuk harte di atas derita dan kesengsaraan orang laen nyang dijadiin karyawan, dihukum seberat beratnye. Kalo perlu, seudeh divonis die kagak boleh ganti baju ganti celana selama ngejalanin tahanan.
          " Biar die nyaho, kayak ape rasanye badan nyang kagak pernah salin pakean selama bebulan bulan," Komeng nyang mencak mencak sendirian, saking keselnye ngegebrak meja.
              Bagusnye, kopi di gelasnye udeh kering. Kalo kagak, pas gelas kopi tumpah lantaran ngegebrak meja, pasti belepotan tuh meja.Pasti sewot tuh si Mimin, sang bokin nyang tau tau udeh ngejentul di hadapen Komeng lantaran die kaget ngedenger suara gelas teguling
               " Ade ape sih, bang... pagi pagi libur gini, bukan olahrage supaye sehat malahan ngegerutu sendirian." Tanya bokinnye.
           "Emang lu gak tau di negeri kite hari gini ada kerja rodi?" Tanya Komeng
           "Yaa abang... ngapain dipikirin. Biarin aje kalo emang senang pada kerja di pabrik roti. Nyang penting, kan ada gawean, duitnye halal dan tiap minggu terima gaji," sahut Mumun nyang jawabannya sama sekali kagak nyambung
         Lantaran kesel ngedenger jawaban bininye, Komeng nyang kagak bisa letupin emosi mantun supaye bokinnye ngerti kalo jawabannye kagak nyambung
              Eh Mumun.. kalo jual teri
            Harganye jangan edan tenan
            Gue ngomong cepet belok kiri
            Lo malah mengkol ke kanan
            Mumun nyang ngeh  kalo die ngasih jawaban nyang kagak nyambung, tentu aja sadar kalo die mesti dinginin situasi." Bang," kata Mumun         
            Petik mangga pake galah
            Semisal manis cepet dikupas
            Kalo tau jawaban bini salah
            Jelasin dong jawaban yang pas

Komeng lantas ngejelasin die sewot lantaran ada kejadian nyang selaen gak masuk akal juga bener bener kagak berprikemanusiaan. Soalnye, puluhan orang nyang direkrut jadi karyawan, pas masuk kerja fasilitas pribadinya disita, dan selama kerja bebulan bulan, selaen kagak digaji juga kagak pernah bisa salin pakean. Mereka disekap gak boleh ke luar.
              Mumun ternganga. Ngusap dada. Beristighfar.
             " Hari gini masih ada nyang nyelenggarain kerja rodi. Makdikepe dobel ngeblangsakin orang laen tuh orang," kate Mumun, nyang lantaran lakinye bilang para karyawan butuh pakean, langsung ngebedel pakaian Komeng dan rencananye, Mumun juga mau ngebilangin tetangga supaye ikutan nyumbang pakean buat puluhan karyawan nyang udeh kerja keras, eh kagak digaji, kagak salin sampe segitu lama.
              Keadilan tuh punya cita rasa
              Bekal serakah ya hawa nafsu
              Kejadian di daerah tigaraksa
              Bikin pikiran dan hati kite lesu

Tweet