BANYAK BINI PERTANDA SUBUR

oleh : Oesman Ratmadja


Kalo di buku, si Budi, kan pagi pagi pasti pergi ke sekolah. Nah, ENTONG nyang udeh kerja pagi pagi kagak ke sekolah. Juga nggak buru buru ke tempat gawean. Tiap pagi, ENTONG pasti ngacirnya bukan kesekolah atawa ke tempat gaweannya, melainkan ke warung mpok RODIAH.

Biasanye, di warung mpok RODIAH nyang nasi uduknye legit banget, kelar ngembat uduk nyang dicampur sambel kacang, ENTONG lantas ngacir pulang. Tapi pagi ini, ENTONG jadi kagak minat ngacir ke rumah. Pasalnye, die lagi kepincut ngedengerin mpok Ijah ame mpok Leha, nyang lagi ngobrol soal seorang eyang yang dalam hal punye bini dianggap paling subur

“Masa' iye sih tuh orang bisa punye bini bererot kayak gerbong kereta?” Kate Mpok Ijah, nyang kayaknye rada kagak percaya

“ Kemaren juga gue bilang masa iye? Soalnye, kate si Mumun nyang anaknye jadi wartawan beritanye udeh kesebar di koran ame televisi. Cuman si Mumun kagak bilang kalo anaknye juga ngeberitain di korannye. Tapi, pas semalem gue nonton layar kaca, mau nggak mau gue kaget.,” Sahut Mpok Leha.

“ Nah nyang lu kagetin ape?” Serobot Pok Ijah.

“ Gue kaget lantaran satu dari tujuh bini tuh orang, malah kepengen ngelaporin babenye ke polisi. Padahal, babenye pengen nyelametin anaknye nyang dijadiin bini ke enem ame tuh orang. Tapi, nyang gak kalah seru, katenye sih, tujuh orang bininye kepingin ngegugat MUI. Sebab, kate MUI, perkawinan tuh orang nyang bininye sampe delapan orang kagak sah alias haram,” jelas Mpok Leha.

ENTONG nyang ngedengerin sembari mulutnye kagak bisa diem lantaran kepedesan, nyang mulenye cuma mau diem, spontan nyeletuk.

“ Eh, mpok. Dari tadi kedengerannye si mpok cuma nyebut tuh orang. Sebenernye siape sih lelaki nyang mpok maksud punya bini sampe delapan perempuan?”

“ Bujuk dah,” sergah mpok Leha sembari mandangin muke ENTONG

“ Bener lu kagak tau kalo di negeri kite ada nyang bisa idup kayak gitu?” Tanya Mpok Leha, agak sedikit kesel tapi die kagak emosi banget lantaran takut kalo si Entong emang bener bener kagak tau. Tapi kalo belakangan ketauan si Entong malah lebih tau, Mpok Leha bakal nakol kepala si Entong pake sendal nyang belum lunas kreditannye.

“Mpok... saye kan kagak pernah nonton koran kagak pernah baca televisi. Jadi, kalo saye udeh tau, ngapain saye nyang biasanye ngacir begitu kelar sarapan, jadi minat ngedengerin omongan mpok?” Kate si ENTONG

“ Iye mpok Leha. Die tuh biasanye kagak pernah ngetem gak beraturan kayak supir angkot Saye tau persis kok kebiasaan setiap pagi si ENTONG,” mpok Romlah nyang juga ngedengerin, ikutan bekicau. Die sengaja ngebelain si ENTONG.

Mpok Leha nyang akhirnye percaya, lantas ngejelasin bahwa nama tuh orang sekarang jadi lebih ngetop dari para artis populer. Padahal, kate mpok Leha, dia bukan artis meski deket dan banyak artis nyang dateng ke die. Cuma, tambah mpok Leha satu diantara sekian banyak artis

nyang dulunye sering dateng ke si eyang, kayaknye udeh bebalik gedeg bebalik kagak suka dan akhirnya ngelaporin si eyang dengan tudingan udeh ngebuka praktek perdukunan.

“ Tapi gue kagak tau, perdukunan nyang die praktekin buat jaga keterkenalan ape buat dapet kekayaan. Nyang jelas, ada nyang udeh terbukti, yaitu, tuh eyang bininye banyak dan MUI bilang bini banyak tuh haram lantaran dinikahin sekaligus. Termasuk, ape nyang dibilang sama seorang bokap nyang anaknye dijadiin bini ke enem”

“ Waah...hebat juga ye tuh orang. Bener bener luar binasa,eh, maksud aye luar biase. Sebab bisa dekat sama banyak artis, bininye bererot padahal udeh tua. Jangan jangan....? “

Lantaran si ENTONG kagak ngelarin kalimatnye, Mpok Ijah nyang juga penasaran banget, jadi kepengen tau ape maksud si ENTONG kok die pake bilang jangan jangan tapi kagak diterusin

“Jangan jangan kenape, Tong ?” Tanya Mpok Ijah nyang penasaran banget.

“ Maksud saye, jangan jangan saye telat ke kantor. Jadi, sebelon pamit, saye cuman mau bilang, sesusah susahnye idup, jangan bepikir buat pergi ke dukun. Sebab, nyang bisa nyebarin rezeki ke belahan dunie, cuma Tuhan. Nah, satu lagi, mpok mpok mesti mau bilangin ke anak anak perawan mpok, jangan sampe mau jadi bini ke sekian dan ke sekian. Oke?”

Tanpa nunggu die dibolehin pulang atawa nggak, ENTONG langsung cabut lantaran die mau gawe. Tinggal Mpok Leha, Mpok Ijah nyang tetap ngobrolin fenomena si eyang nyang lebih tinggi dari harga bawang merah dan bawang putih.

Mpok Romlah nyang asyik ngelayanin pembeli lain, akhirnya bilang:

“Maaf yee pok kalau nggak kebagian. Soalnye, dagangan aye udeh ludes. Lantaran dari tadi mpok bedua kagak pesen, jadi kagak aye sisain”

Mpok Ijah cuma bisa saling pandang sama mpok Leha. Die kagak nyangka, datang duluan ke warung tapi bisa kagak kebagian. Tapi, mereka sepakat, banyak bini pertanda subur kagak boleh sampe diikutin oleh laki masing masing (Ode)

Tweet