KEPINGIN JADI ORANG SABAR

oleh : Oesman Ratmadja



Sebenernye sih udeh lama juga Dul Keplok kepengen jadi orang sabar. Maklum selama jadi orang nyang jauh dari sabar, bawaannya spaneng alias gampang banget kesetrum emosi. Kalo dah emosi, jangan kate kucing nyolong ikan jatah buat makan Dul Keplok, ayam biangnya bekotek kotek ribut kayak mau betelor, begitu kagak betelor dicubit tuh paha ayam sampe biru metalic
Makanye Dul Keplok yang kangen banget jadi manusia sabar, ngediskusiin niatnye ke Jaim. Mestinye sih tuh temen nyang namanye Jaim pantes dipanggil ustad. Tapi Jaim sendiri nyang ogah banget dipanggil ustad.

“ Lu kan dari kite kecil biase manggil gue Jaim, kenape lu pake manggil gue ustad Jaim? “ Begtu kate sohibnye nyang jadi temen Dul Keplok nyang waktu kecil suka bareng nimba di empang, maen bola di waktu ujan deres dan kadang kala ngembatin singkong di kebon para tetangge nyang sekarang udeh berubah jadi pusat pertokoan.

“ Jadi nggak ape ape nih kalo gue tetep aje manggil lu Jaim?” Tanya Dul Koplak

“ Entu nyang malah gue arepin, fren. Bukan gue kagak mau lu panggil gue ustad Jaim. Cuman, gue belon sanggup mikul beban amanah. Syet, deh, kan repot, kalo semisal lo besok dateng, mau minjem duit buat kondangan tapi kebetulan gue lagi bokek lantas gue nggak ngasih, ape nggak sedih kalo di dalem ati lu ngegerutu terus bilang, jadi ustad kok pelit. Iye, kan ?”

Dul Koplak langsung manggut manggutin kepala. Die jadi paham kenape temen kecilnye nyang kalo ngajar ngaji anak anak kampung Gedubrak Reyot, nggak pernah mau ngutip bayaran lantaran die selalu bilang ikhlas dan kalo udeh nyebut ikhlas nggak ada alasan pembeneran buat terima upah

“Bukan itu aje, fren,” kate rekan kecilnye nyang lanjutin omongan

“ Gue tuh kan manusia biase, nggak lepas dari khilaf. Nah, kalo mendadak lo dateng nyelonong ke rumah gue lantas bawa motor gue tapi gak pake ngomong minjem, terus saking emosinye gue ngegampar, lho? Lo kan pasti ngegerundel dan bilang, padahal ustad, tapi baru motornye dipinjem ama temen , meski kagak bilang bilang kan nggak perlu ngegampar. Ustad kok ngegampar orang? Kalo akhirnye gue sampe kayak gitu, gimane coba? Kan lebih asoi kalo gue biase biase aje. Tetap si Jaim. Jadi, kalo lo ngutang gue kagak kasih, paling lo bilang si Jaim pelit. Bukan ustad Jaim pelit. Iye, kan?” Kate Jaim dengan sangat serius

“ Iye juga sih. Gue salut deh sama lo kalo begitu. Cuman, gue makin salut nih kalo lo mau ngebimbing gue, gimane caranye jadi orang sabar. Gue udeh bosan, Im jadi orang nyang emosian,” kate Dul Koplak.

Sejenak, Jaim tercengang. Tapi selintas berikutnya, Jaim mengangkat kedua tangan. Lalu, bersujud ke lantai. Baru kemudian die bilang

“ Alhamdulillah... gue bersyukur sama Allah kalo emang lo bertekad mau jadi orang sabar. Cuman, sanggup kagak lo ngelakonin kesabaran?”

“ Ee Jaim, gue kan makanye dateng udeh bertekad. Jadi, gue mesti sanggup. Terlebih, kalo lo mau ngedoain gue supaya bisa jadi orang sabar, insya allah gue bakalan makin sanggup, Im “ sahut Dul Koplak.

*******

Dul Koplak mulai ngerasain, jadi orang sabar malah kebanyakan kagak enaknye. Nah, dimane enaknye kalo pas lagi duduk duduk di teras, eeeh, anak anak main nyelonong masuk ke pekarangan, langsung naik ke pohon jambu kesayangannye. Bukan cuman ngambilin jambu nyang udeh mateng, nyang masih mengkel diembat juga.

Kalo inget belon janji kepingin jadi manusia sabar, boleh jadi Dul Kolak langsung emosi. Tuh dua bocah, bukan aje disuruh turun. Tapi, lantas digamparin. Kalo nangis, Dul Koplak malah nyuruh kedua itu anak manggil nyokap bokapnye. Biar digampar sekalian sama Dul Koplak, lantaran nggak bisa ngedidik anak sehingga masih bocah udeh berani ngembat jambu punya orang, dan di waktu nyang punya pohon lagi asyik duduk di teras

Nyang paling kagak enak jadi orang penyabar , dirasain sama Dul Koplak nyang waktu nyela masakan bokinnye kagak enak, sang bokin nyang biasa lembut tiba tiba aja malah berani nabok. Pas Dul Koplak mau bereaksi, se-nggaknye mau ngembek, ngomel ngomel, eh, bokinnye langsung ngejawab.

“ Kalo macem macem atawa mau ngebales nampar gue, detik ini juga gue langsung bilangin lo sama si Jaim,” kata bokinnye.

Diancem kayak gitu, tentu aje Dul Koplak gak cuman sebatas kaget dan ngerasa bakalan malu, kalo bokinnye bener bener ngelaporin. Lantas, buat apaan Dul Koplak janji bakalan sanggup nahan ujian kesabaran kalo saat itu die tetap emosi. Dan, janji ke temennye ples janji sama dirinye sendiri nyang pastinye mesti dihormatin dan dijunjung tinggi, membuat Dul Koplak ikhlas nyorongin pipi kanannya supaya ditampar lagi sama sang bokin.

“ Biar seimbang, pan barusan lo nampar pipi kiri, sekarang nyang kanan mesti lu tampar juga, dong “ pinta Dul Koplak, dan brengseknya, sang Bokin bukannye bengong buat mikir sejenak, malah langsung ngegaplok pipi kanannya.

Kalo nginget semua ujian nyang dialamin Dul Koplak waktu die kepingin ngerobah emosi jadi sabar, beratnye emang kagak ketulungan. Tapi, entu semua sudah berlalu. Sekarang, Dul Koplak sudah dikenal orang sekampung sebagai sosok nyang penyabar. Nggak percaya? Lihat aje tuh tempat pembayaran rekening listrik. Biasanye, meski dateng belakangan, Dul Koplak langsung nyelonong ke kasir dan minta supaya dilayanin secepetnye. Kalo permintaannye ditolak, dia kagak cuman langsung emosi. Tapi, sekaligus bereaksi. Die langsung masuk ke ruang kasir. Langsung nabokin tuh si petugas.

Saat ini, Dul Koplak nampak ikutan ngantri, kelihatan  tenang menunggu namanya dipanggil.

Tweet