CERBER (64)

ENAM PULUH EMPAT

     Ngendaliin diri, supaye mangkin terhindar dari kemauan negatif nyang seudeh dipikir mateng mateng, malah bisa nyelakain diri sendiri. Emang, awalnye ditandai ama sukses, yaitu, berhasil nyekek mantunye. Ujungnye?

     Wow…. Malah bikin sengsare. Sebab, begitu Nina koit, begitu ada nyang curige atas kematian Nina Beler, polisi pasti mengusut. Ujung ujungnye, lantaran pasti ditemuin ada tande tande penganiayaan nyang jadi penyebab koitnye Nina, polisi pasti meriksa dirinye.

     Akhirnye…. Hiiiiiiii… pasti di penjare.

     Nyang bikin engkong Lihun ngeri, bukan suasane di penjare nyang kondisinye pasti kagak ngenakin. Sebab, kong Lihun yakin, dirinye bisa ngatasin. Malah, die yakin, bisa ngendaliin sesame napi, segimane die pernah bisa nguasain wilayah di mase muda dan semua orang tau kalo dirinye adalah sang jawara.

     Jadi, nyang justeru ditakutin engkong Lihun, kagak lain kalo nama baiknye tercemar. Bentar bentar diberitain di televise, di koran, sebagai seorang pembunuh berdarah anget.

     Kalo kenyataan nyang kayak begitu sempet terjadi, menimpa dirinye, niiih muke mau ditaruh dimane? Busyet, deeeh, nahan mokal kayaknye lebih berat, lebih menderita timbang digebukin petugas nyang kalo sama tersangka lebih sering ringan tangan sama ringan kaki.

     Meski begitu, kong Lihun yakin, kalo sebatas pukulan ples tendangan petugas nyang sering banget melayang ke bodi para tersangka saat melaksanakan tugas memeriksa mereka, kagak ada ape apenye. Semisal sakit, bisa cepet sembuh. Kalo mokal?

     Mau ditaruh di mane nee muke?

     Nggak mungkin, kan disimpen di kulkas, apelagi engkong Lihun alergi sama dingin. Juge kagak mungkin di simpen di bank, sebab di sane udeh banyak rekening gendut ples transaksi nyang mencurigakan. Gitu juga kalo di titipin di Bank Indonesia, kagak mungkin banget. Sebab, kong Lihun kagak mau disangke terima dane dari Century nyang dilaporin bakal berdampak sistemik kalo nggak dikasih talangan.

       Juga nggak bakalan betah semisal ditaruh di rumah mewah, kalo tuh rumah dibeli atawa di bikin dari duit hasil korupsi. Hiii, dimane enaknye punya rumah mewah dari duit suap kayak nyang dicontohin sama Akil Mochtar. Buktinye, akhirnye die ketangkep tangan sama KPK.

     Jadi, emang lebih bae mikir soal enjoi dan selamet dunie akhirat, timbang mesti nyekek si Nina Beler, sang mantu nyang emang sih nyebelin tapi biarlah tuh mantu miara sifat jeleknye. Toh, sebagai mertoku kong Lihun bisa nge-embargo.

     Seenggaknye, die bisa ngedesek anaknye supaye betindak teges. Artinye, kalo nggak bisa nasehatin sang bokin, nggak bisa ngerubah kelakuan buruknye, lebih bae dibuang aje ke tong sampah

                              *******

12)

      Mumun bukan kagak ngedenger kabar soal kong Lihun, nyang katenye begini, begitu, malah waktu Mumun belanja sayuran di wa rungnye mpok Dower, ada juga nyang bilang engkong Lihun secare langsung atawa kagak langsung, udeh nyeselin sikapnye nyang gegabah, lantaran udeh keliru betindak alias salah pilih mantu.

Bersambung……

Tweet