oleh : Oesman Ratmadja
MAT BODONG sama sekali kagak nyangka, kalo dirinye bisa berkenalan sama seorang wanita alias perempuan nyang minta supaye Mat Bodong manggil dirinye dengan sebutan Bunda Putri.
" Busyet deh... kok lo pake kaget, sih? Emang kagak percaye kalo semua kenalan manggil gue Bunda Putri?" Tanya itu perempuan nyang juga kaget lantaran seudeh minta Mat Bodong manggil dirinye dengan sebutan Bunda Putri, malah langsung kayak orang kesambet Jin nyang minta pensiun dini lantaran males ngelaksanain tugas ngeganggu manusie, sebab belon juga diganggu nyang namanye manusia malah udeh pada kebelet pade mau ikutan lomba korupsi
" Sa..saye sih percaye.. Cuman.... " sahut Mat Bodong yang sekarang gugup lantaran kagak nyangka kalo kagetnye langsung bisa diendus sama Bunda Putri
"Cuman ape? Ngomong yang jelas dong," pinta Bunda Putri, yang dikenal sebagai sosok wanita energik yang kate orang kenal sama pejabat dari tingkat erte sampe ke tingkat kelurahan
"Cumannye cuman kagak nyangka bisa ketemu ples bisa langsung kenalan sama Bunda," kate Mat Bodong, nyang akhirnya bisa mengenedalikan gugupnye, meski dirinye belon pernah terdaftar sebagai anggota penanggulangan bencana
"Anggep aje eni anugerah, dan lhoo mesti bersyukur. Sebab, kenal sama gue, lo nggak nggak bakalan rugi. Sebab, orang orang nyang udeh kenalan sama gue, pasti bilang untung banget," kate Bunda Putri
" Maksud ibu....," sela Mat Bodong
" Busyeet dah... kan gue udeh bilang lo mesti panggil gue Bunda Putri. Kalo lo nyebut ibu, kuping kenalan gue bakalan pengeng. Soalnye, semua kenalan gue cuman kenal Bunda Putri," kata Bunda Putri nyang langsung ngingetin Mat Bodong
Mau kagak mau, Mat Bodong cepet cepet mohon dipersori. Lantas die janji, kagak bakalan salah nyebut lagi. Terlebih, kate Mat Bodong, dirinye emang lagi butuh seseorang nyang bisa ngebantunye. Maklum, bokinnye lagi sakit dan die kagak bisa bawa bokinnye ke rumah sakit, lantaran kagak gablek doku dan upayenye ngurus multi guna supaye bisa berobat gratis, malah terus terusan kepentok lantaran selalu dapet jawaban, ruang rawat buat pasien nyang pake kartu multi guna sudah pada penuh.
"Nyang saye heran, bukan cuman di satu rumah sakit nyang bilang udeh penuh. Tapi, semue rumah sakit nyang saye datengin, tanpa belas kasihan, begitu ditanya langsung ngejawab sudah penuh," keluh Mat Bodong.
Ngedenger keluhan Mat Bodong, nyang namanye Bunda putri langsung cekakakan. Tapi, Mat Bodong kagak berani menyoal kenape denger die ngeluh, Bunda Putri malah ngakak. Mestinye, kan, langsung pamerin simpati ples empati?
Untung aje, Mat Bodong kagak protes. Die yakin, kalo protes Bunda Putri kagak bakalan ngasih tau, kalo nyang kagak kenal ples deket sama orang dalem rumah sakit atawa pejabat, meski status sakitnya udeh
super parah, tetap aja kagak bakalan dapet pelayanan.
Tapi, kalo punya kenalan orang rumah sakit nyang ditunjuk buat ngelaksanain layanan multi guna, atau akses ke instansi nyang ngurus multi guna, nyang didapet bukan kesulitan. Tapi, super kemudahan alias kapan aje bisa berobat dan langsung mendapat layanan gratis.
"Jadi, sekarang mendingan lo pulang deh ke rumah. Langsung bawa bokin lo ke rumah sakit. Gue jamin, kalo lo bawa eni," kate Bunda Putri sembari nyodorin kartu namanye.
" Gue jamin lo bakal diperlakukan dengan sangat arif nyang pake bijaksane. Pokoknye, kalo lo dipersulit, telpon gue. Oke?" Kate Bunda Putri.
Akhirnye, Mat Bodong emang bisa narik nafas nyang lebih lega dari Gelora Bung Karno. Cuman, selama ngejagain bokinnye di rumah sakit, ati Mat Bodong terus menerus miris. Pasalnye, bokinnye nyang kalo di rumah biasa bebas kentut, selama di rumah sakit malah kesulitan ngebuang gas. Soalnye, di ruangan khusus pengguna multi guna, sumpek bin sumpek.
Maklum, isinya bukan cuma dua tiga orang. Tapi, buanyaaak. Mau ke Kamar mandi kudu sabar, saat jam besuk, kuping pengeng. Pokoknye, selame di rawat di ruang multi guna, Mat Bodong gak putus putusnye ngingetin sang Bokin supaye sabar, dan kalo mau kentut lepas aje, sebab, kalo bunyinye kenceng Mat Bodong bakal langsung nunjuk tangan, dan mengatakan saye minta maaf lantaran baru aje kentut lantaran kagak sanggup lagi nahan mules.
0 Response to "BERKENALAN DENGAN BUNDA PUTRI"
Posting Komentar