CERBER (50)

LIMA PULUH

KONG Lihun nyang lagi asyik-asyiknye bobo - jeilee bobo coi, lagi pules pulesnye sleeping, mau kagak mau mesti melek , ngebuka matanye nyang maunye sih terus dimeremin. Maklum, tereakan nyang sumbernye dari luar pintu kamar kagak beda sama suara geledek, kenceng banget. Suara nyang ngagetin Kong Lihun bukan cuman manggil babe. Tapi juga kayak campur sari. Sebab, juga pake ngegedor pintu kamar segala. Brengsek banget, kan?

Sepules-pulesnye orang lagi bobo, kalo kupingnye masih normal – kagak congean, pasti keganggu. Pasti bangun. Mangkanye, Kong Lihun langsung melekin matenye. Tentu aje sembari ngegerutu. Soalnye, siape sih nyang suka kalo lagi asyik tidur, dibangunan, Eh, dibangunin

“Sekolahnye pasti kagak setinggi anak gue,” gerutu kong Lihun sembari ngeliat jam 

Kong Lihun sempet kaget juga lantaran udeh pukul sepuluh. Mangkanye doski  buru-buru turun dari ranjang. Tereakan nyang bekali-kali manggil babe, bikin Kong Lihun wajib bukan pintu kamar.

Busyet, deh. Begitu pintu kamar dibuka, mantunye langsung nyap-nyap.

“Dasar babe budeg. Congek. Dipanggil-panggil.. digedor- gedor, bukannye cepet bangun malah  makin asyik molor !” Sentak Nina, sembari kacak pinggang ples melototin mata

Bujuk buneng, dah. Siape nyang kagak heran kalo mantunye nyang kemaren lembat lembut sekarang berubah jadi kayak mak lampir

“ Eh, Nina....lu kenape? Diledekin  genderuwo ape dicolek pocong, sih? “ Tanya kong Lihun nyang belum pulih banget dari ngantuk, meski kaget setengah koit kagak langsung nimpalin pake emosi. 

Jawaban Nina Beler, sungguh di luar dugaan. Soalnye, ditanya bae bae jawabnya malah makin sewot

“Ngomong asal ngejeblak. Emangnye babe pejabat? Emangnye genderuwo berani ngeledekin Nina? Emangnye, pocong sanggup nyolek Nina? “

         

Engkong Lihun ngegaruk-garuk kepala. Bingung. Kagak tau mesti ngejawab ape. Soalnye, die kagak siap ngadepin perobahan nyang begitu ngedadak.

Empat jam nyang udeh lewat, pagi kerasa begitu indah. Segelas kopi item, senyum lem but Nina, kecupan di bibir waktu nyium tangan mertua, lambaian waktu ke bandara, sama seka li kagak bisa dijadiin tanda, jam sepuluh, sesam pe di rumah, nyap-nyap kagak keruan, ngomel, ngebentak mertua.

“Ini, ada ape, sih, sebenernye?”

“Ada ape-ada ape? Mestinye, babe tuh tau, bang Udin lupa ngasih ongkos, lupa ningga lin duit belanja. Mestinye, babe juga tau, waktu Nina naek taksi, supirnye ngedadak minggirin mobil. Begitu dua penumpang betampang se rem nyang nunggu di pinggir jalan masuk ke taksi, tu supir langsung ngebut. Kagak lama, Nina lagi bingung, mau nanya kok ngambil penumpang, leher Nina langsung ditempelin golok!”

“Astagfirullah Hal Adziem “

“Babeeee!” sentakan Nina jadi mangkin  kenceng, tapi kagak beda sama ember plastik bolong

“ Kalo orang stress lagi cerita, babe jangan motong seenaknye. Emangnye babe demen yee ngikutin jejak sopir angkot atawa sopir metro mini nyang kalo di jalanan hobinye suka nyerobot!”

 “ I..iye..iye… gue minta maaf, ” kate kong Lihun, sambil berusahe nentremin diri

Kong Lihun nyang  kesima, terus ngerasa kasian sama mantu nyang baru aje cerita waktu di taksi ditodong pake golok, sebenernya mula in maklum kenape begitu sampe ke rumah , mantunye marah-marah. Mangkenye kong Li hun minta maaf.

Tapi, Nina malahan jadi histeris. Die kagak peduli kalo caranye bikin Kong Lihun jadi serba salah.

Bersambung………

Tweet