CERBER 28

Oleh:  Oesman Ratmadja

DUA PULUH DELAPAN

         “Buat makan di sini ape buat dibawa pu lang, be ?”

         Kong Lihun nyang lagi ngerasa nikmat nguyup kuah sayur ketupat, langsung kesedek. Dia kaget. Soalnye, kenal banget sama suara nyang baru die denger.

         Untung, bang Panjul selalu nyiapin aer tee di meja. Tapi, Panjul kagak ikutan nulu ngin. Dia cuman noleh sekelebat. Ngeliat nyang di sebelah kong Lihun anaknye sendiri, Panjul nyepetin nyiapin ketupat buat Nurdin.

          “Ati-ati, be kalo makan.” Kate Nurdin, sambil ngedeketin ujung gelas ke mulut babe nye.

          Nurdin berharap babenye bisa netralisir diri. Die jadi tenang, lantaran seudeh nenggak aer teh, bokapnye keliatan udeh normal lagi

          Kong Lihun narik nafas panjang sekali.

          “Bisa abis tuh, be, makan jengkol segitu banyak?”

          Kong Lihun kagak ngejawab. Die meloto tin anaknye. Nurdin kagak peduli. Die langsung ngeraih tangan babenye. Nyium tangan babe nye, sambil terus ngejelasin

          “Sorri be, sorri…di lokasi, hujan kagak berenti berenti. Kite jadi kebanyakan break Jadwal syuting jadi molor. Mangkanye baru bisa pulang tadi pagi. Terus, aye langsung ke kantor PT Asoi Geboi Letoi Film, buat  nge bahas film terbaru nyang asyik punya be. Soalnye, Udin dipercaya jadi sutradara.. Begitu kelar,langsung cabut. Sampe rumah. babe ka gak ada. Oh iye, babe sanggup ngabisin jengkol sepiring mentung ?”

          “Gue tuh lagi sebel sama, lu, tau ?”

          “Ya, babe gitu,deh. Udin kan baru aje minta mohon dipersori “

          “Ini, bukan soal gue kasih sorri ape ka gak. Gue tuh kuatir. Udeh pulang ngaret, bukan ngabarin, eeeh, dihubungin juga susah. Tau nggak sih, lu, kalo babe  jadi sport jantung ?”

          “Laen kali, kagak bakalan, be, Udin bikin babe sport jantung lagi. Kemaren tuh, hape Udin kebawa sama artis nyang pulang duluan. Die pinjem hape Udin lantaran keabisan pulsa. Eh, lupa mulangin.”

          “Dasar artis geblek. Lupa mulangin ape emang kagak mau mulangin ?”

          “Tenang aje, be. Ntar malem Udin ambil, kok, ke rumahnye?”

          “Gimene gue bisa tenang? Gue tuh udeh ngelamar buat calon bini lu, tau ?”

          “Babe gimane juga, sih? Kan Udin udeh bilang, tunggu sampe Udin pulang

        “Nyang bilang sebelon besok kite ngela mar lu udeh pulang, siape? Terus, nyang bilang yang penting masih orisinil, siape? Babe ape elu?”

        “Memang aye, be. Oh iye, gimane kalo kita bahas di rumah aje.”

        “Oke. Lu pikir babe takut ?”

        Nurdin malah ngajak ngobrol pedagang ketupat

        “Bang Panjul..maaf, tolong dibungkus aje. Kayaknye, jadi enakan di bawa pulang. Oh iye, berape semue. Sekalian sama nyang udeh babe makan ples jengkolnye tuh “

         Sambil cepet cepet ngebungkusin, bang Panjul ngejelasin berape nyang mesti dibayar Nurdin.

                                                                           *****

Bersambung........

Tweet