CERBER 29

Oleh : Oesman Ratmadja

DUA PULUH SEMBILAN

          KALO tadi kong Lihun ketar ketir lanta ran Nurdin belon juga pulang. Sekarang, seu deh Nurdin di rumah, kong Lihun ketar ketir lantaran Nurdin baru aje bilang, besok ia mau ngelamar Nina Beler, perawan nyang tinggal di kampung sebelah. Tepatnye, kampung Sukapa la, gang Suka Sama Suka  erte sembilan erwe kosong satu.

          Rencane besok, kata Nurdin kagak bisa die batalin, lantaran udeh dijadiin acara formal dan keluarga Nina Beler udeh masak-masak buat ngejamu Nurdin dan keluarge.

            Nurdin juga bilang, mangkanye die mau ngelamar Nina Beler, lantaran dua minggu belakangan, ngudak-ngudak Nurdin sampe ke lokasi syuting. Nina Beler udeh ngungkapin rasa cintanye ke Nurdin, dan die cepet cepet minta dilamar lantaran adenye, juga udeh mau nikah.

            Jadi, dasarnya, Nina Beler kagak mau dilangkah. Mangkanye, nguber Nurdin dan Nina, siap jadi bini Nurdin nyang penurut. Iste ri nyang berbakti dan lebih mementingkan ngeladenin laki timbang ngeladenin diri sendiri

            “Udin tuh, mangkanye mau lantaran Nina Beler mau duluan sama Udin, be. Mangka nye, Udin kasih persyaratan, kalo kagak ngurus Udin, bakalan Udin pulangin secepetnye ke orangtuanye. Die juga janji, kagak bakal neru sin karir sebagai penyanyi dangdut pinggiran ?”

            “Ape lu bilang? Jadi, si Nina Beler tuh, penyanyi dangdut pinggiran ?”

            “Emangnye, kenape be? Menurut Udin, malah asyik punya, tuh. Kalo di rumah lagi empet, suruh aje die nyanyi buat ngehibur kita Asyik, kan ?”

            “ Din…punya bini artis tuh berat risiko nye? Lebih baik, lu pilih si Mumun aje. Die anak rumahan. Ngajinye pinter. Sholatnye rajin Juga, keliatan banget kalo bisa dijadiin bini. Kalo cewek kayak si Nina Beler, pantesnye buat pajangan doang “

        “Babe jangan berprasangka dulu. Kan Udin udeh bilang sama babe, kalo die kagak nurut, kagak ngurus Udin, bakalan terima risiko berat. Jadi, babe nggak usah kuatir. Udin bisa, kok, ngendaliin

       “Din, bukan soal bisa ape nggaknye? Tapi gimane tanggung jawab gue soal si Mumun. Tiga ari lagi, kan sebentar, Din. Nah, di hari ketujuh, die mau ngasih jawaban. Kayaknye, kagak bakalan ditolak, Din. Lu tinggalin aje tuh si Nina Beler ?”

       “Nyang mau kawin, kan, Udin, be. Kenape malah Udin nyang disuruh ninggalin Nina Beler. Kalo babe nyang ninggalin si Mumun, kayaknye kagak bakalan nyusahin kite?’

      “Ape lu kagak tau, gue tuh kenal bae sama si Somad. Aaaah, lu kok cuman musingin gue aje, sih? Giliran gue suruh nyari bini, beginilah, begitulah. Adaaaaa aje alesan. Giliran udeh gue lamarin, eeeh, elu malah mau ngelamar pilihan, lu. Gue jadi pusing…pusing…pusing “

       “ Be..kenape mesti pusing? Die kan belon kasih jawaban. Naah, sebelon arinye buat  die kasih jawaban dateng, babe kan, bisa nemuin die. Jelasin deh ape adenye. Udin rasa, jadi no problem, deh “

       “Emang enak lu, kalo cuman ngomong. Gue tuh, punya beban moral, tau? Mane waktu ngelamar, si Mumun nyangka gue nyang mau ngawinin die. Tapi,begitu gue jelasin, die ngerti dan kayaknye, die emang kepengen, deh, jadi mantu gue. Lu kawin sama si Mumun aje, ye?”

        “Kayaknye kagak bisa tuh, be. Terlebih, si Nina Beler, juga siap nikah doang, be. Die setuju kagak ada resepsi. Setuju kagak pake dangdut atawa layar tancep. Die juga setuju, perkawinan aye sama die, sederhane tapi malahan mantep. Resmi, terkendali dan kagak pake jual tanah segala, be “

         “Kalo entu sih, hak dan kemampuan ma sing-masing orang. Cuman, gue lebih setuju lu kawin sama si Mumun” Tekan Kong Lihun

Bersambung……

Tweet