Delapan
JULEHA emang belon bebas dari bingung. Cuman, die ngerasa sedikit lega. Sebab, nyang dateng ke rumah cuman bokapnye. Die kagak bakal berani blak blakan ngakuin ape nyang udeh die lakuin selama ini, kalo aje nyokapnye ikutan nyatronin
Pokoknye, dalem kasus ini, Juleha lebih bae kagak mau terus terang kalo nyokapnye nyang ngelakuin introgasi. Kalo sama bokapnye, Juleha malah kepingin lebih bae ngaku blak blakan. Sebab, sang bokap malah marah gede semisal tau anaknye kagak jujur.
"Terus, sekarang Juleha mesti gimane dong, be?"
" Yaa.. gimene dong. Babe kan dateng cuman kepengen tau ape masalahnye sampe si Komeng nyang biasa dateng bedua, ngedadak di hari kerja malah dateng sendirian terus ngelapor kalo ada masalah. Cuman, die kagak mau cerita, sebab, ngerasa kagak enak.
Menurut babe, ada benernye juga die bersikap kayak gitu. Soalnye, boleh jadi die kagak mau ngejelek jelekin bininye di depan mertoku"
" Bee....," rajuk Juleha
" Emangnye lelaki kalo udeh kesel suka kayak gitu, yee?"
Sang Bokap nyang jatoh kasian sama anaknye, bukan kaget malah sepul alias senyum simpul
Bikin Juleha gemes. Sebab, nyang dibutuhin Juleha jawaban bukan senyum simpul nyang meski kesannye sayang sama anak, tapi malah bikin Juleha penasaran. Maklum, baru kali ini Juleha ngalamin masalah nyang sama sekali di luar dugaan. Sebab, nyang diprediksi sama Juleha selama ini, aktivitasnye kagak bakal ketauan. Kagak bakal kebongkar. Nyatanya, malah tengsin alias ketahuan
Itu sebabnye Juleha kagak punya stok jawaban. Kagak punya solusi buat ngeredam atawa ngelarin masalah.
" Babe kok malah senyum simpul, sih? Babe nggak kasian yee, sama anak?" Kate Juleha
"Elu jangan ngomong kayak gitu, dong, Ha. Masa babe kagak sayang sama anak," sahut babenye.
"Buktinye, aye nanya babe bukan ngejawab malah senyum simpul kayak ngeledek"
"Babe tuh bukan ngeledek. Cuma, kayaknye pertanyaan lu tuh nyama ratain sifat lelaki. Cuma, lu emang mesti tau, kalo enyak lo dulu berbuat kayak gini, boleh jadi babe bukan sekedar ngambek. Tapi, marah berat"
Juleha kaget.
Nggak nyangka kalo jawaban sang babe kayak gitu. Artinye, malah lebih "sadis". Lebih tegas dari bang Komeng, nyang emang marah tapi ngediemin. Diajak ngomong malah mingkem. Malah ngehindar nyang artinye kayak kagak mau lagi ngobrol.
Terus, gimane Juleha bisa ngelarin masalah kalo die kagak tau ape nyang dimauin bang Komeng. Mau minta maaf, kagak dikasih kesempetan. Mau janji kagak bakal ngulang perbuatan, gak dikasih ruang. Bang Komeng sendiri, kagak ngeliatin sikap teges. Artinye, kelihatan banget marah tapi Juleha kagak tau, marahnye kayak gimane dan sebates ape.
Coba kalo ngomong blak blakan. Kan jadi enak. Juleha jadi bisa cepet cepet ngelakuin eksiyen nyang disesuain sama kondisi kemarahan lakinye. Kalo kayak gini?
" Duuuuh... bang Komeng mau nyiksa gue ape mau bikin gue kurus kering, sih ?"
Seabis ngomong di dalem ati, Juleha minta ke bokapnye supaye jangan pulang. Die sengaja minta ditemenin, lantaran nggak enak kalo lakinye pulang, tetep besikap sedingin es balok nyang baru dicetak di pabrik.
" Kalo babe nemenin lo di sini, terus ntar ape kate enyak lo?" Kate sang Bokap.
Jawaban bokapnye bikin Juleha kembali resah. Pasalnye, bukan nggak atau mau nahan supaya babenye kagak buru buru pulang. Tapi, Juleha malah jadi takut kalo nahan babenye, nyokapnye nyang sendirian di rumah malah nyatroni, lantaran Juleha tau persis, sang nyokap, nyang kagak bisa akrab sama bang Komeng dan juga kagak mau ditinggal lama sama lakinye, bisa bisa malahan dateng ke rumahnye.
Kan bener bener makin repot kalo nyokapnye dateng sekalian kepengen tau masalah nyang ngejiret aneknye.
Bersambung.......
0 Response to "TAK AKAN KULEPASKAN 8"
Posting Komentar