DUL PREMIUM GUGAT
oleh : Oesman Ratmadja
SEBENERNYA, udeh lamaaaaaaa banget Dul Premium kepengen ngegugat bokap sama nyokapnye. Cuman, kagak pernah direalisasi. Bukan lantaran takut dibilang, " Dasar anak gak tau ngucapin thanks you sama ortu" atawa satu dan hal lainnye. Dul Premium takut penyakit gampang bisul nyokapnya, kumat. Sebab , tiap kali enyaknye stress, keteknye pasti tumbuh bisul. Nah, kalo tuh bisul susah pecah, di tengah malem, enyaknye sering jejoakan.
Kalo udeh begitu, Dul mokal sama tetangga. Sebab, tiap enyaknye jejoakan di tengah malem, besok paginye, para tetangga nyang ketemu sama Dul Premium, pasti komen. " Semalem, Bisul di ketek enyak lo kambuh lagi, yee, Dul"
Kalo udeh begitu, kayaknye, kepingiiiin banget ngumpet di lumpur lapindo. Biar nggak ketemu sama tetangga. Sayang, lokasinye jauh banget. Kalo deket, biar lagi ngumpet di sane, Dul Premium pasti ikutan berpartisipasi semisal warga nyang jadi korban ngegelar demo lantaran belon juga terima ganti rugi.
Kenape, dulu dulu, Dul Premium kepengen banget ngegugat atawa protes ke bokap ples nyokapnye?
Lantaran, nama nyang die sandang, lebih sering bikin dirinye sial. Buktinye, tiap ada pengumuman dari pemerintah nyang mau naikin BBM, Dul Premium bukan aje kena semprot. Tapi, juga sering jadi sasaran kekeselan temen temennye, nyang kagak setuju harga premium dinaekin.
Pokonye, nyandang nama Dul Premium bener bener bikin ribet. Banyak sialnye tapi sama sekali kagak ada untungnye. Buktinye, tiap kali Dul bawa motornye ke SPBU, meski di zaman sekolah ngasih unjuk kartu pelajar kalo namanye Dul Premium, tetap aje mesti bayar harga premium nyang dikucurin ke tangki motornye
Pernah Dul ngotot sama petugas SPBU supaye dikasih BBM gratis lantaran pas giliran naek die jadi korban. Tuh petugas SPBU, bukannye simpatik dan merasa iba ples suprise lantaran ada anak muda nyang punya nama Dul Premium, eeeh, malah bilang begini.
"Saya bersedia memberi gratis BBM. Tapi, anda harus memenuhi satu syarat"
"Syarat ape, mas?" tanya Dul nyang sempet optimis lantaran direspon.
Dengan kalem, si petugas bilang," Syaratnya mudah. Tolong bawa akte atau tanda kenal lahir anda. Kalau di surat tersebut anda benar punya nama pake Premium karena lahirnye di Pom Bensin atawa SPBU, sehari lima kali saya siap memberi anda gratis premium"
Dul nyang semua kepengen hepi lantaran punya peluang dapet premium gratis, langsung down. soalnye, kata nyak babenye, die lahir di rumah sakit dan bukan di SPBU.
oooooooooooooo
" Waktu cabe kriting sama bawang naik dan harganye sampe kelangit, lo diem. Belon lama, waktu harga jengkol juga naek dan gue jadi libur makan jengkol, lo juga diem. Kenape giliran harga BBM naek lu protes? Lagian, kan, kenaikan BBM bukan baru sekarang. Kenapa dari dulu lo kagak protes?" tanya sang bokap, nyang tentu aje jadi kaget lantaran anaknye, nyang udeh bekali kali harga BBM naik, tapi baru sekarang ngegugat lantaran kata sang anak, tiap kali harga BBM naik dirinye selalu ketiban pulung, apes terus
Dul Premium kepaksa ngejelasin ke bokapnye kenape dia akhirnye mesti protes. Cuman, pas ngejelasin kagak pake emosi. Juga kagak pake sikap anarkis. Nyang juga penting, suara Dul kagak digeber, lantaran takut nyokapnye nyang udeh bobo bangun dan lantas ngedenger. Kan repot, tuh, kalo bisulnye kambuh.
" Oooo... jadi, begitu nasib nyang nimpa dirilu? Duuuh, kenape lo baru cerita sekarang, Dul. Mestinye, lo ceritain masalah elo dari dulu. Dari jamannye presiden nyang sebelon presiden sekarang. Kalo lo bilang dari dulu, nggak bakalan gue kaget," kate bang Somad, nyang lagi lagi kaget.
Kalo pertama die kaget lantaran Dul Premium ngegugat. Kedua, dia kaget, lantaran tiap pemerintah naekin harga BBM, anaknye pasti didatengin apes.
Begitu tau alesannye, Bang Somplak bukannye marah malah kasih ide sama anaknye supaye dateng ke DPR atawa dateng ke istane, dan bilang terus terang kalo Dul Premium kagak mau dinaekin dan die nolak dinaekin bukan lantaran demen sama defisit anggaran. Tapi, kasian sama masyarakat kecil. Sebab, kalau pun dapet sejenis BLT, tetep aje ekonominye kelimpungan bin babak belur, lantaran kalo premium dinaekin, para pengusahe kagak pernah punya alesan buat nurunin harga barang. Nyang ada, malah semakin punya alesan buat naekin harga barang, mulai dari bulu ketek nyang alami sampe bulu mate palsu pasti ikutan naik.
Apelagi nyang namanye sembako. Pasti makin somse. sebab, tiap kali naik, kagak pernah bikin pengumuman bersedia turun. Pokoknye, kagak beda sama pejabat, nyang males banget turun, meski misalnye, ujian nasional bermasalah.
Dul Premium ternganga. Bingung. Soalnye, niat die cuman satu, ngegugat bokap atawa nyokap.
Eeeh, malah disuruh dateng ke DPR atawa ke istane dan minta supaye dirinye nggakdinaekin.
"Be... kalo pas aye dateng ke DPR terus para anggota dewannye lagi pada bobo gimane?" Tanya Dul Premium
" Kalo lo dateng mereka lagi pada asyik bobo, yaa mendingan lo ikutan tidur. Kan lumayan, sesekali lo bisa tidur di ruang be AC," sahut bang Somplak
"Lhaa, kalo aye ikutan bobo, lantas kapan aye bisa dateng ke istane?" Tanya Dul Premium
Kali ini,. bokapnye si Dul Premium berbalik bingung. Bukan lantaran kagak bisa nganter anaknye ke istana supaya bisa ngajuin permintaan harga anaknye jangan dinaekin. Bang Somplak bingung, sebab, kalo BBM jadi dinaekin, masih bisa kagak die makan pake jengkol. Sebab, bbm belon naik aje harganye udeh selangit. Gimana kalo harga BBM jadi dinaekin?
"Ribet banget deh idup gue kalo gara gara BBM naik semua harga barang jadi ikutan naek," gerutu bang Somplak, nyang yakin kantongnye bakal tambah somplak setelah harga BBM naik
Dul Premium jadi kasian juga ngedenger keluhan bokapnye.
0 Response to "SKETSA : BBM OOH BBM"
Posting Komentar