MULANYE sih, KOMENG malah ngucap Alhamdulillah, die bersyukur lantaran meski hari masih pagi, udeh ada orang nyang dateng ke rumahnye. Pokoknye, Komeng seneng banget lantaran die merasa kedatangan berkah. Seenggak enggaknye, kan die bisa ngejamu tamunye meski cuman nyediain segelas air putih. Ditambah dengan rasa senang hati nyambut tamu nyang dateng, Komeng yakin, kalo hari ini full diem di rumah, die udeh punya tabungan. Tabungan apelagi kalo bukan tabungan kebaikan. Bukankah menyambut tamu dengan senyum ikhlas dan menyajikan hidangan, misal sebatas segelas air putih, artinye udeh menebar kebaikan?
Cuma, nggak lama Komeng spontan mesti beristighfar.
Pasalnya, lelaki nyang langsung memperkenalkan diri sebagai tukang kredit, nggak cuman menolak waktu die dipersilahkan masuk. Tapi juga langsung berkata dengan nada kesal.
" Pak... saya datang ke sini bukan mau numpang ngopi atawa ngeteh gratis. Tapi mau ketemu isteri bapak, nyang udeh tiga bulan kagak pernah lagi nyicil kreditan. Saya sudah kesal, pak, sebab, tiap saya datang menagih, isteri bapak selalu menghindar. "
Meski kaget bukan alang alang di Hambalang, eh kaget bukan kepalang, Komeng nyang udeh istighfar, mampu meredam kesal sama bokinnye nyang pagi pagi buru buru pamit pergi ke pasar.
"Memangnya, isteri saya ambil kreditan apa saja dari bapak?" Tanya Komeng
Si tukang kredit nyang kepengen banget tagihannya dibayar, buru buru ngeluarin buku cukup tebal, dan dengan agak sedikit buru buru, dia membuka sebuah halaman tak bernomor, dan tanpa ragu dia menunjukkan catatan utang bokin Komeng nyang keliatannya panjaaaaang banget.
"Haaaahh ? Jadi, ini catatan utang isteri saya ke bapak?" Tanya Komeng.
Sudah barang tentu, Komeng kayak nggak percaya meski baru aje die ngeliat fakta
"Jika bapak tidak percaya, saya maklum. Hanya, beri saya izin untuk menemui isteri bapak dan bapak boleh menyaksikan apakah isteri bapak, mengakui yang saya catat ini utangnya atau sekedar tulisan yang saya catat," kata si tukang kredit.
Komeng bukan kagak mulai jengkel sama bokinnye, nyang ternyata punya banyak utang kreditan nyang kagak dibayar bayar. Cuman, di depan tukang kredit, doski nggak mau komen soal bokinnye, yang baru sekarang ketahuan hobi ambil barang kreditan tapi males bayar.
Untungnye, Komeng megang doku. Kalo kagak?
Ape kata debt colektor, kalo si tukang kredit menyewa jasanya untuk menagih?
"Sekarang gini aje, bang. Kan semuanye sekian, tuh. Nah, hari ini, biar deh saya bayarin separuhye dulu.Nggak apa apa, kan, bang?" Tanya Komeng
Sejenak, si tukang kredit nampak berpikir. Tapi sejenak kemudian, langsung menjelaskan kalau dia bersedia menerima bayaran meski hanya separuhnya. Cuman, kata si tukang kredit, dia berharap minggu depan seluruh hutang isteri Komeng dilunasin, dan Komeng diminta tidak tersinggung jika setelahnya dia tak berkenan lagi mengkreditkan barang ke isteri Komeng nyang waktu ngambil rajin dan semangat banget, tapi giliran bayar malesnye minta ampun alias susah setengah koit.
**********
KOMENG nyang emang sengaja nunggu kedatangan isterinya dari pasar, kagak langsung negor Rogaya nyang gayanye kayak capek abis, lantaran ngejinjing belanjaan buat makan di hari Minggu bersama Komeng nyang ada di rumah
Seudeh ngeliat Rogaya santai, barulah Komeng ngedatengin bokinnye nyang keliatan sok sibuk, lantaran merasa punya kewajiban membuat masakan buat laki, nyang die tau kalo Komeng makan di rumah, seleranya meningkat seratus prosen.
" Lu udeh bisa diajak ngobrol, kan?" Tanya Komeng
"Yaaa... abang... diajak terbang melayang ke awang awang aje aye selalu stand bye, masa diajak ngobrol sama suami sayang mesti ngejawab kagak siap. Gak lucu, ah, bang." sahut Rogaya nyang sama sekali kagak nyaho kalo Komeng lagi nahan emosi semaksimal mungkin.
Tanpa buang waktu, Komeng mulai bersuara. Die mulai menginformasikan kalo tadi, sewaktu Rogaya ke pasar ada tamu yang datang ke rumah. Komeng sudah siap menyajikan segelas kopi, kalo tamunye mau diajak masuk. Eh, kata Komeng, ternyata tuh tamu malah nolak mentah mentah
"Padahal, niat gue kan bener, supaya asyik ngobrol dan die bisa nyeruput kopi nyang gue sajiin sambil ngobrol dan nikmatin suasana santai. Brengseknye, tuh tamu malah nolak"
"Abang ajak masuk, itu tamu malah nolak? Busyet, deh. Makdikipe dobel gardan banget, tuh tamu. Emang abang kagak nanya, ngejamu tamu tuh kewajiban utama tuan rumah?"
"Gue sih berusaha ngejelasin. Cuma, kalo die nolak, gue mau bilang ape?"
"Lantas, ngapain dia betamu kalo diajak masuk malah nolak. Orang kagak waras, kalee"
"Orangnye sih kelihatan seger, waras dan punya semangat hidup," kate Komeng
" Kalo orangnye kayak gitu, lantas ape alesan die nolak ajakan abang buat masuk ke rumah"
Komeng menghela nafas. Panjaaaaaaaaaaaaaaaaang banget. Soalnye, dia berusaha untuk tidak numpahin emosi nyang sebenernya udeh mau meledak. Setelah mikir sudah saatnye masuk ke pokok persoalan, barulah Komeng ngejeblakin intinye.
" Eh, Gaye... Lo tau nggak kenape tuh tamu malah sengaja nolak ajakan gue?"
"Yaaa... abang... mane aye tau. Lagian, kalo aye nyang digituin, pasti udeh langsung aye suruh minggat," sahut Rogaye nyang masing belum ngeh kalo die mau "ditembak" lantaran sama utang kreditan kerjaannye terus terusan nembak.
"Tadinye, gue juga udeh kepengen ngusir tuh orang. Cuman, begitu die ngenalin diri sebagai tukang kredit, dan nyodorin catetan utang elo nyang die catet di bukunye, dan die bilang udeh tiga bulan lebih lo kagak pernah bayar cicilan, gue nggak jadi ngusir tuh orang"
Mendengar penjelasan lakinye nyang diuraikan dengan kalimat lemah lembut, ulekan batu nyang ada di tangan Rogaya lepas dengan sendirinye dan jatuh ke lantai setelah menimpa kakinye.
Entah lantaran mokal setengah koit, entah lantaran shock, entah kagetnye bejibun jibun ton lantaran kagak nyangka kalo akhirnye, Komeng punya tujuan buat menguak rahasie dirinye, Rogaye nyang sempat ternganga kayak ngeliat ada gempa bumi, die langsung memingsankan diri. Bukan sengaje pingsan. Tapi, emang pingsan lantaran kagak kuat nanggung beban. Maklum, rahasie sejatinye akhirnye katahuan.
Siangnye, Rogaye baru sadar. Die terpaksa ngejelasin, kalo duit buat bayar kreditan selalu habis buat pulsa,lantaran die hobi sms-an. Hobi ngobrol bejem jem sembari masak sama rekan rekan nyang hobi ngerumpi, tapi kagak pake ngumpul di pos rumpian.
" Aye salah bang... Aye cuman bisa minta maaf. Kalo abang nggak maafin, gimane nasib aye?" Kate Rogaye nyang keliatan nyesel dan lantaran merasa bersalah die sangat berharap lakinye ngasih beribu ribu maaf
Tentu aje Komeng mau maafin. Cuman, Komeng ngajuin tiga syarat.
Pertame, Rogaye mesti ngejual BBnye buat ngelunasin utang dan kalo kurang Komeng siap nambahin
Kedua, Rogaye diminta buat nyetop megang HP lantaran tuh hape bukan bawa manfaat malah ngedatengin mudarat, lantaran salah kaprah ngegunain benda canggih. Mestinye buat komunikasi tapi dijadiin alat ngerumpi dan ningkatin gengsi
Ketiga, Komeng kagak lagi ngasih duit gaji kecuali duit cuman buat belanja sehari hari. Jadi, kebutuhan laen, Komeng langsung nyang bakal nanganin.
" Iyee...aye siap bang. aye ikhlas, lantaran aye emang mesti ngubah prilaku," kate Rogaye nyang kembali lega lantaran lakinye kagak betindak lebih jauh.
" Timbang gue dipulangin ke rumah ortu, mending insaf ngerumpi, deh," ucap Rogaya dalam hati
0 Response to "UTANG NEMBAK PULSA KONTAN"
Posting Komentar