LIMA
DALAM kondisi kagak keruan lantaran nanggung beban moral nyang kebangetan berat, Juleha kayak kagak sanggup megang pinggang Komeng. Biasanye, kalo boncengan, Juleha pasti melok erat pinggang lakinye. Kali ini, Juleha kagak mampu melakukan hal yang sama. Bukan kagak bisa, sebab sebenernye sih cuman tinggal ngelingkarin kedua tangan. Cuma, sikon dan toleransinya bener bener bikin Juleha nggak sanggup melakukan hal nyang biasa die terapin.
Terlebih, Komeng, lakinye sama sekali kagak mau ngomong barang sepatah kata.
Bahkan, sesampe di rumah, Komeng mingkem abis. Kelar markir motor dan nyabut helm, lakinya cuma rebahan di sofa. Sikap Komeng nyang kayak gini, tentu aje ngebingungin Juleha. Sebab, mau bikinin air putih atawa teh atawa kopi, kuatir kagak diminum.
"Ape sih nyang mesti gue perbuat," gumam Juleha, nyang nyesel abis soalnye sama sekali kagak nyangka kalo hari Senin Pahing bakalan ketemu apes
"Kayaknye gue mesti ambil inisiatif buat minta maaf. Kali aje, atinye bisa langsung cair buat maafin gue," batin Juleha, nyang lantas nekad nyamperin lakinye nyang rebahan di sofa dengan pandangan nyang aneh.
Sebab, keliatannye, pandangan Komeng nyang ngeliatin langit langit rumah kosong. Tapinye pas Juleha nyamperin buat minta maaf, eeeh, lakinya bangun lantas dengan sikap nyang menurut Juleha aneh bin ajaib, mingser. Komeng bukan cuman ngejauh. Tapi langsung masuk ke kamar.
Untungnye, Komeng nggak ngunci pintu kamar dari dalem. Kalo tuh kamar dikonci dari dalem, Juleha merasa nggak punya peluang buat nyamperin. Lantaran kagak dikunci, Juleha punya harapan. Malah, Juleha merasa gak sebatas punya harapan. Tapi malah merasa punya peluang.
"Bang Komeng sebenernye pasti kepingin ehem ehem. Cuman, pas dibelain pulang dari kantor, guenye nggak ada di rumah. Jadi, die esomi, eh, emosi. Hmmmm... kayaknye gue mesti atraksi nih. Pasti die kangen goyangan gue," begitu kata batin Juleha, nyang lantaran masih shock, pikirannye jadi cetek.
Buktinye, meski Juleha ati ati buka pintu dan waktu ngelangkah ke dalem kamar langsung nyetel senyum terindah-- sambil siap siap melorotin busana, Komeng malah nyambut dengan kalimat nyang bikin Juleha makin sedih
" Lebih bae lo nggak usah senyam senyum palsu. nggak usah deh eksiyen mau melorotin pakean. Sebab, sekarang juga gue mau ke rumah orangtua lo," sambut Komeng nyang lantas bediri, lantas bergegas ke luar dari kamar.
" A..a..abang mau ngelaporin masalah ini ke nyak sama babe?" Tanya Juleha nyang tentu aje semakin cemas. Sebab, die tau ples yakin seyakin yakinnye, masalah rumit bisa bakal tambah kusut lantaran kalo nyak babenye tau, dia pasti disemprot abis.
Malah, boleh jadi rambutnye dijambak. Di unyeng-unyeng kayak anak kecil ngunyeng ngunyeng dakocan.
"Duuuuuuh... kenapa bisa jadi begini, Kenape?" kate Juleha sembari nahan suara supaya kagak kedenger orang.
Kenape die bilang begitu. Soalnye, Komeng sama sekali nggak ngegubris pertanyaan Juleha. Lakinye malah langsung cau. Huuuh, mentang mentang masih pake uniform orang ke kantor.
"Kalo gue nyusul, malah tambah runyem. Gengsi gue juga bakalan ambruk. Sebab, bang Komeng bakal ngeliat langsung gue dijambak sama enyak. Dicubit sekenceng kencengnye sama babe. Lagian, kenape gue malah jadi demen ngayap yeee. Tapi,abis enak sih?" Kate Juleha bicara sendirian
"Dateng ke rumah mertoku, bukan cium tangan malah nyetel muke gersang. Emang kenape lu ngedadak jadi kayak orang ribet sama masalah?" Tanya Pak Jupri, bokapnye Juleha alias mertoku Komeng, nyang begitu ngeliat mantunye dateng, kepaksa ngelepas hobinye ngutak ngatik kembang.
"Babe kan nggak tau kalo saye lagi kesal berat sama anak babe. Jadi, saye minta dengan hormat, nggak usah deh babe perhatiin sikap saye. Sebab, saye dateng mau ngelapor, ntar malem mau mulangin Juleha ke sini?" Sahut Komeng
Orangtue mane nyang kagak keget ngedenger sang mantu, blak blakan bilang mau mulangin iserinye ke rumah sang orangtua. Orangtue mane?
Kagak heran kalo Pak Jupri ternganga. Dia kaget setengah koit. Untung, bokinnnye masih ke pasar. Kalo udeh masak, tuh manu pasti diajak makan.
"Jadi...lu mau nyerein binilu nyang kagak laen anak gue?" Kate pak Jupri nyang meski kaget tapi masih bisa mengapresiasi maksud dan niat Komeng
" Be... jadi orangtua tuh jangan sok tau. Tadinye, saya emang punya niat kayak gitu. Cuman, gimane juga, Juleha pan bokin saye. Jadi, saye mau mulangin bukan berarti mau nyerein. Tapi, mau minta kesediaan babe sama enyak, buat ngedidik ulang si Juleha, supaye gak salah kaprah dalem berumah tangge?"
" Emang si Juleha bikin ulah ape?"
"Nyang jelas, saye sangat kuciwa, eh,maksud saye, sangat kecewa. Cuman, saye nggak mau ngejelasin kenape. Sebab, lebih baik babe sendiri nyang nanya langsung sama Juleha kenape hari ini saye kesal berat, terus nanti malem mulangin die ke rumahnye"
"Lhaaaaa... ape salahnye kalo elu cerita barang sedikir?"
"Be... kalo saye nyang jelasin, ntar bisa lebih kagak mau kurang. Tapi, kalo Juleha nyang terus terang, babe bisa ambil kesimpulan kayak ape marahnye saye. Cuma, kalo die kagak jujur, kagak terus terang ngejelasin masalah hari ini, mau nggak mau saye bakalan ambil tindakan tegas dan berprinsip. Maaf be... sekarang saye mau pamit dulu, mau numpang tidur di kamar bekas pake Juleha. Mau nenangin pikiran. Sebab, kalao saye malah ngayap, takut kecantol sama cewek laen," kate Komeng, nyang lantas ninggaling pak Jupri dengan seenaknye.
Ape nyang lantas ada dalem pikiran pak Jupri dan tindakan ape nyang bakal beliau ambil, kalo ngadepin masalah kayak gini?
Busyet deh..... sabar yeee.... kan masih :
Bersambung...................
0 Response to "TAK AKAN KULEPASKAN 5"
Posting Komentar