oleh : Oesman Ratmadja
MIMIN emang kagak segeblek adenye, si Mumun. Selaen kalem,Mimin juga kagak matre. Bukan berarti Mimin kagak doyan duit sama kagak kepingin punya barang barang yang wah mewah. Cuman, die sadar, kepengen tuh boleh. Cuma, jangan maksa apelagi memaksakan diri. Jangan kepaksa apelagi akhirnye punye alesan buat jual diri, hanya demi ngedapetin kemewahan.
Jadi, jelas beda sama si Mumun. Lantaran beda karakter ples beda cita rasa Mumun kagak pernah sepakat sama pendapet mponya. Nggak percaye? Lihat aje pas dua duanya nonton berita soal artis nyang dipanggil KPK buat jadi saksi lantaran mereka "dituding" udeh terime aliran dana dari seorang koruptor nyang pinter banget maenin sapi.
Nyang bikin kaget, si koruptor sapi bukan cuma nyelonongin doku ke rekening para cewek kace. Tapi juga ngegelontorin benda nyang masuk olongan mewah. Selaen arloji nyang harganye nyampe 70 juta perak, rata rata juga pada dapet mobil. Nyang ngaku kagak terima mobil cuma mbak ayu aja sehari hari.
Kate die, digelontorinnye cuma sedikit. Ntu juga lantaran dijanjiin mau di kasih job. Soal bener kagaknye, cuma die deh nyang tau. Kite kite nggak boleh sok tau.
Lantas ape kate Mumun, nyang kayaknye kesel banget sama ulah tuh cewek nyang baru kenal, kok mau dan malah seneng sih dikasih hadiah?
" Kalo kagak ada ape apenye, nggak mungkinlah. Nah tuh orang aje duitenye boleh nyolong. Jadi, gak mungkin koruptor berubah jadi dermawan. Nyang pasti, penuh pamrih. Kalo kagak pamrih, kasih dong nenek nenek jompo, pakir miskin, janda nyang sengsare"
" Gue tau duit tuh orang boleh nyolong. Cuman, ape salahnye kalo kita dikasih. Gue sih seneng seneng aje, tuh, dikasih hadiah. Apelagi hadiahnye berupa barang mewah," timpal Mimin
"Kagak malu luh terime barang mewah dari koruptor?"
" Malu tuh nomor sebelas, pok. Namaye kan dikasih hadiah, Jadi, dapet rezeki, kan emang kudu kite terima. Kan jadi repot kalo dibilang sombong"
" Mimin...Mimin... tuh koruptor, ngasihnye tuh bepamrih. Asal dokunye juga dari sejenis nyang haram. Rusak banget, deh pola pikir lu," sergah Mumun
"Emangnye mpok kagak suka duit... kagak suka kemewahan," timpal Mimin.
"Naluri manusie, apelagi kaum hawa, pasti suka sama nyang begituan, Min. Cuman, perempuan tuh kudu waras.Kudu normal. Jangan maen terima hadiah gitu aje,dong. Apelagi, baru kenal. Jadi, pikir dulu pendapetan timbang nyesel nggak guna. Ape kagak malu kalo akhirnye malah dipanggil KPK. Kalo udeh gitu, lo mau bilang ape?"
"Kalo gue sih, maunye dapet hadiah tapi kagak dipanggil KPK," sahut sang adik dengan santai.
"Emang dasar ngeres, yee, otak lo. "
"Tapi Mimin tetep mau, kok pok kalo dikasih hadiah. Nyang penting bukan dapet hadiah lewat sms tapi ujungnye duit kite ludes diembat sama para penipu."
" Nah, kalo gitu, ape bedanye ? Koruptor juga kan penipu. Cuma cara ngembat duitnye aje nyang beda. Kalo penipu sms korbannye individu, kalo koruptor nipu rakyat sama nipu negare. Ngerti loo"
"Aye sih pasti ngerti pok. Cuma, tetap mau kok kalo ada nyang kasih mobil mewah. Siap kok diajak kawin siri. Nyang penting terus menerus dibelai sama kemewahan"
Mumun spontan ambil bantal. Niatnye, mau dilemparin ke muka adenye. cuma, sayang urung. Sebab, terdengar suara dari bang Toyib, bokap mereka
"Udeh malem, bukannye cepet cepet bobo malah diskusiin soal cuci uang. Awas lu yee kalo pada telat nyuci baju babe sama pakean enyak"
Suara itu nyang membuat keduanya buru buru matiin tv dan matiin lampu kamar,
0 Response to "KEPINGIN DAPAT HADIAH MOBIL"
Posting Komentar