TAK AKAN KULEPASKAN 2

DUA



      KOMENG punya kesempetan buat nyelidikin ulah Juleha, setelah dapet cuti selama dua hari. Tapi, die kagak bilang sama bokinnye. Kalo bilang, dia pasti yakin, Juleha nggak bakal ngayap kemane mane. Sebab, selama ini, tiap Komeng ada di rumah, bokinnye emang nggak pernah ngayap sebelon nyediain keperluan suami.

       Jadi, Senin pagi gak beda sama hari laen di saat masuk kerja.

       Kelar sarapan, Komeng pamit. Juleha mantep bener nyium tangan lakinye. Malah, ngedoain supaya pulangnye bisa bawa duit lebih. Kelar salamin lakinye, Juleha nyetel posisi supaye lakinye nyium jidatnye dengan sepenuh mesra. Kelar dicium jidatnye nyang sedikit agak nong nong, Juleha buru butu buka pintu pagar.

       Lantas, Komeng  ngeraung raungin motornye. Seudeh manasin mesin motor nyang alhamdulilah kreditannye udeh lunas, Komeng ngasih salam. Juleha ngebales salam Komeng sambil ngeliatin kepergian suaminya dengan sangat takzim. Disebut begitu, soalnye Juleha terus menatap kepergian Komeng sambil ngelambai lambaian tangan, dan die baru masuk seudeh sosok lakinye ngilang dari pandangan.

      " Laki gue kan udeh ngantor. Sekarang, giliran gue ngantor ke posko rumpian," kate Juleha, nyang kayaknye seneng banget lantaran yakin kalo lakinye bakal kayak biasa, balik ke rumah sekitar jam lima sore. 

        Komeng nyang baru aje ke luar dari pintu gerbang perumahan,langsung ngarahin motornye ke sebuah mesjid nyang lokasinye kagak jauh dari jalan raya

Tanpa ragu, Komeng masuk ke halaman mesjid nyang cukup megah. Kelar markirin motor, Komeng langsung ke bagian teras mesjid. Kelar buka sepatu, Komeng lantas rebahan di teras. Die lantas ngeliat arlojinye.

      "Kemane ni marbot mesjid.Biasanye ada di sini, " Komeng ngomong sendirian sambil plarak plirik, nyari sosok pak Karyadi nyang die kenal rajin ngejalanin tugas, 

        "Tumben kagak keliatan?" Komeng penasaran

         Kembali plarak plirik. 

     Lantaran sosok pak Karyadi kagak juga keliatan, Komeng lantas ngelangkah ke tempat wudhu. kelar ngambil air wudhu, dengan santai Komeng kembali ngelangkah ke tempat semula. Kali ini, Komeng mesti rela shalat dhuha di teras mesjid. Emang nggak mungkin bisa shalat dhuha di dalem lantaran pintu mesjid dalam keadaan terkunci.
       Emang gak masalah.Malah, Komeng tetap berusaha untuk shalat dhuha dengan khusuk. Dia gak lupa berdoa, minta sama Allah Subhanallah Taala supaye hati bokinnye dilempengin. Dijadiin wanita atawa perempuan sholehah, perempuan yang siap diemong oleh suami yang gak lain imamnya.
       Kelar shalat dhuha, Komeng dengan tenang pake lagi sepatunye yang tadi dilepas.
       Baru dia ngerogoh kantong. Ngambil telepon genggam dan ngebel bokinnye.
       " Hallo...Eeeh, abang... emangnye udeh sampe kantor," kata Juleha nyang di kuping Komeng, suaranye kedenger begitu mesra.
       " Udeh atuh say... Alhamdulillah, selamet sampe di kantor,"sahut Komeng
       " Oke deh bang. Met kerja, yee. Maaf... jangan lama lama, soalnye, Leha lagi bersihin ikan. Ntar kalo ikannye malah digondol kucing gimane? Kembang juga belon disiram, tuh. Nah, abis eni Leha mau langsung nyiramin kembang"
       "Iye, deh. Met sibuk di dapur, yee say?" Kata Komeng, nyang lantas matiin hapenye.
       "Sekarang,waktunye gue ngebuktiin, bener gak die ada di rumah ape bener die udeh di markasnye," Komeng kepaksa ngoceh sendirian, lantaran mau ngoceh sama marbot mesjid kebetulan lagi nggak ada. Mau ngoceh sama siape coba?
       Makanya Komeng buru buru nyemplak ke motornye.
       Meski kagak ngebut, akhirnye Komeng sampe di depan rumahnye.
       Di hari Senen, bukan cuman rumahnye nyang sepi. Rumah tetangganye juga sunyi. Komeng nyang seudeh matiin mesin motor, plarak plirik ke halaman rumahnye, nggak ngeliat bokinnye lagi nyiram kembang.
       " Die pasti masih nyiangin ikan," batin Komeng sembari ngambil selulernye di kantong jaket.
       Tanpa ragu, setelah mencari nama bokinnye, Komeng langsung ngebel.
        Tak lama Komeng ngedenger lagi suara Juleha.
        " Idiiih... abang.... tumben belon lama ngebel udeh nelpon lagi?"
        " Emang nggak boleh nelpon bini nyang ngedadak dirinduin laki?"
        " Pastinye sih jelas boleh bang. Cuman, maaaaaf banget. Leha kan lagi konsen nyiramin kembang. Ntar, kalo hape Leha kesemprot aer, emangnye abang mau ngebelin BB?" Ujar Juleha dengan sangat mesra, tapi dia tak tahu kalo suaminya nelpon dari depan rumah dan Komeng, sampe melototin mata selebar lebarnya, nggak bakalan ngeliat bokinnya berdiri di halaman rumah yang katenye sih lagi sibuk nyiram kembang
          " Oke deh kalo begitu. Siraminnya nyang merata ye, supaya kembang kembang kita terus seger buger," sahut Komeng, nyang kelar matiin HP langsung narik nafas panjang.
          Bukan lantaran kagak kesel. Malah, Komeng kesel setengah koit. Bayangin, die ada di depan rumah dan nggak ngeliat kembangnye lagi disiramin, eh, bisa bisanye, sang bini ngaku lagi sibuk nyiram kembang.
          Cuman, meski kesel, Komeng nyang ngerasa baru aje dikentutin sama Juleha, berusaha ngeredam emosi.
          " Kepale boleh panas. Tapi ati gue kudu tetep dingin," kate Komeng, nyang kembali narik nafas panjang, lantaran die kagak mau emosinye meledak meski mulai paham, kalau laporan laporan sebelonnya bukan sekedar isapan jempol atawa isepan jari manis. Tapi malah isepan tinja.
          Die pasti ada di markasnye
          Komeng nyang mulai yakin kalo bokinnye ada di markas rumpian,bertekad meluncur ke lokasi nyang beda dua gang dari rumahnye



Bersambung...........

Tweet