oleh : Oesman Ratmadja
BUAT Bang Boneng tentu aje aneh. Pasalnya, anaknye nyang diarepin jadi anak sholeh, malah mangkin jauh dari jejak kesholehan. Bang Boneng was-was, lantaran pas nginjek umur 15 tahun, anaknye malah mulai kebanyakan ngayap. Nyang tadinye kagak pernah nangkring, sekarang hobi banget nongkrong. Nyang dulunye kagak hobi pulang malem, sekarang malah mulain sering pulang pagi.
Nyang bikin bang Boneng cemas campur gemas, Rojali juga udeh bakalan lupa sama kewajiban ngejalanin shalat. Kalo sebelonnye pas denger azan kagak usuh disuruh udeh langsung shalat, sekarang kalau kagak diingetin sampe diomelin, malahan kagak shalat. Di waktu Subuh apelagi, kalau pas kagak bedagang alias lagi tidur di rumah, kalo belum disiram aer atawa kedua kakinye belon diseret, jangan kate jadi shalat. Bangun aje susahnye kebangetan.
" Lu nggak usah stress, Bon. Namanye juga lagi nginjek usie remaje. Die pasti lagi asyik nyari jati diri. Ntar juga balik lagi kayak waktu belon akil baligh?" Kate pak Miun.
Pak Miun nyang dipinta pendapat, juga ngejelasin, umumnya, remaja seusia Jali emang begitu. Artinye, die lagi cari identitas, mencari jati diri, sehingga yang lantas diubek ubek bukan cuman kebaikan. Nyang namanye keburukan, akhirnye juga dilakonin. Cuman, tambah pak Miun
" Kite sebagai orangtue kagak boleh ngebiarin die kebablasan. Jadinye, jangan terlalu dikekang tapi mesti tetep diawasin supaye kagak lantas kecantol sama hal yang nggak berguna dan die bisa lupa belajar, lupa sama berbagai kebaikan nyang sebelonnye die udeh kenal dan sering ngelakonin"
Bang Boneng nyang lantas penasaran, suatu sore akhirnye manggil anaknye nyang pas kelar shalat Maghrib udeh ganti pakean sholat sama pakean buat mejeng.
"Duduk lu." sentak bang Boneng nyang rada sewot lantaran Rojali nyang diminta duduk malah keliatan mau pegi gitu aje.
" Ade ape sih, be?" Tanya Rojali nyang kepaksa duduk di depan babenye sembari nahan kesel.
" Lu kok sekarang jadi kagak keruan, sih? Besok sekolah bukannye belajar malah ngayap. Emang lu mau jadi manusia botol nyang ogah punya masa depan?" Bang Boneng mulai bekicau.
" Yaa babe... aye eni kan lagi nyari jati diri, be. Jadi, babe nggak usah usil ama ape nyang aye lakoni," sahut Rojali dengan sikap tenang
"Jadi, bener nih nyang lo cari cuman jati diri?"
"Yaa... gitu deh be. Di umur kayak aye, kan, cari jati diri tuh penting banget, be. Supaya bisa dengan cepet aye menemukan jadi diri aye." tegas Rojali.
"Oke.. kalo emang lu mau nyari jati diri, besok lu mesti ikut gue," kata Bang Boneng dengan tegas. lantaran langsung ngingetin kalo besok nggak ngikutin ajakannye, Rojali kagak bakalan dikasih duit selama seminggu
Rojali nggak berani nyahut.
Tapi besoknye, Rojali kepaksa akhirnye nanya ke babenye kenapa\e die diajak ke sebuah kebon luas kepunyaan temen babenye.
" Be.. ngapain sih ngajak aye ke sini?"
"Lo.. kan lu bilang lagi cari jati diri. Sekarang, lu bisa dapetin dengan gampang karena nyang lu cari ada di depan mata lu," jelas bang Boneng
" Maksud babe ape, sih?" Rojali kembali bertanya lantaran kagak ngerti maksud babenye nyang ngebaqa die ke kebon luas nyang dipenuhi oleh pohon jati
"Eh Rojali," tegas bang Boneng
" Ngapain lu susah susah nyari jati diri. :Lu lihat kan nyang ada di sekliling kite? Semua jati nyang tumbuh siubur di kebon ini, semuanye berdiri. Nggak , ada nyang rebah, kan? jadi, lu tinggal bilang sama babe, jati nyang bediri di bagian mane nyang lu kepengenin. Nyang ini, nyang itu atawa nyang belah sono. Lu tinggal pilih, nanti bakal babe minta temen babe buat langsung nebangin buat lu"
Rojali tercengang. Die kagak nyangka kalo babenye ngira dirinye lagi nyari pohon kayu jati nyang saat tumbuh memang berdiri. Malah, lumayan tinggi. Sebab, ada nyang sampe delapan meter.
" Payah juga deh kalo punya babe kagak konek," Rojali cuman bisa ngegerutu dalem ati.
http://bit.ly/28WyL2a
0 Response to "MENCARI JATI DIRI "
Posting Komentar