LAPORAN SEPAKBOLA

oleh : Oesman Ratmadja


       GIMANE engkong Boim kagak heran seheran herannye? Omen, sang cucu, pas ditanya mau ke mane eeeh die jawab mau ke sekolah.tapi bukan mau belajar. Kalo ke sekolah bukan mau belajar, lantas mau ngapain? Tanya engkong Boim. "Mau nyerahin laporan sepakbola," kata Boim sembari nodong kakeknya supaya ngasih doku buat jajan. Seudehnye, Omen ngeliatin judul laporan yang sudah dibuatnya.
       Laporan pertandingan sepakbola, antara Indonesia XI versus Liverpool
       Sebab, kemaren, sama guru olahraga die dan temen temennye dikasih tugas supaya mulai belajar bikin laporan sepakbola. Guru olahraganya cuma kasih kata kunci, agar isi laporan mengandung komen komen yang fair seperti kalau penonton siara langsung menyaksikan ulasan para komentator yang jago banget saat ngomentarin pertandingan.
        Nah, semalam, begitu kelar  nonton siaran langsung pertandingan Liverpool dengan Indonesia XI, die gak mau buang waktu. PR nya langsung dikerjain dan pagi ini mesti diserahin langsung ke guru olahraga.
       Cuma, engkong Boim yang langsung heran seheran herannye, malah ngalokin cucunye supaye jangan bertindak gegebah. Jadi, engkong Boim minta supaya Omen membatalkan niatnye
       " Lhoo... maksud engkong ape, sih ?" Tanya Omen, nyang tentu aje jadi ikutan heran meski versinye berbeda
       " Eh Omen... Engkong nanya nih ama elu, yee... Lu tuh ngelaporin sepakbola, emangnya tuh sepakbola salah ape? Setau engkong, sepakbola kite emang biasa kalah. Jadi, ngapain kekalahannye pake lu laporin? Lu nggak usah cari cari penyakit, deh?" Tegas Ngkong Boim
      Omen yang tadi heran dan sekarang terlihat kaget, tentu aje dengan spontan nepok jidatnye.
      " Eeeeh... kenape gue alokin lu malah nepok jidat?" Kate Engkong Boim, yang berbalik jadi sewot lantaran nganggap cucunye kagak mau denger nasehatnye
     " Kooooong... Omen tuh jelas mesti nepok jidat. Sebab, nyang engkong bilang tuh cuma bikin Omen stress," kate si Omen.
     " Bujukbuneng.... engkong Lu tuh ngalokin demi kebaekan, Men. Ngapain lu kudu stress?" Kate engkong Boim nyang sewotnya ilang dan berbalik jadi kuatir.
     " Kong... semalem kan ada pertandingan Indonesia XI lawan Liverpool. Nah, guru Omen nugasin supaye jalannye pertandingan, hasil pertandingan dan hal laen nyang kite liat selama pertandingan, kudu Omen tulis dalam bentuk laporan. Naaah, pagi ini, tuh laporan tertulis nyang Omen bikin wajib diserahin ke guru olahraga. Jadi, Omen bukan mau laporin sepakbola ke polisi," sahut Omen, yang terpaksa ngejelasin supaya engkongnye kagak lagi salah paham
     Engkong Boim ternganga. Kalau tadi die kuatir sama Omen yang dikirain mau cari perkara, sekarang beliau kesel sama guru olahraga Omen
     " Eh, Omen... emangnye guru olahraga elu nggak bisa nonton langsung di Stadion GBK atau di televisi yang ngegelar siaran langsung? Bilang sama guru lo, jangan cuma maunye tinggal terima laporan dari murid muridnye. Kalo die nggak punya duit buat beli karcis, bilang sama guru olahraga lu minta duit beli karcis sama engkong. Kalau begini caranye, kan tuh guru olahraga cuma mau enaknye doang. "
    Omen yang ngira penjelasannye bisa dimengerti, kembali menepok jidatnye lantaran sang engkong yang dikira langsung paham, malah dinilai Omen mangkin kagak paham.
    " Busyet, deh. Kalo gue layanin pasti bakalan bisa telat sampe di sekolah, nee," kate Omen dalam ati.
    Lantaran Omen kagak mau telat sampe di sekolah, Omen kepaksa bilang sama engkongnye kalau die mau nyampein pesen engkongnye ke guru olahraganye.
   " Sekarang, Omen pamit dulu, yee Kong," ujar Omen sambil buru buru ninggalin engkongnye.
   " Naaah... gitu dong, lu. Sebagai cucu gue. lu mesti berani ngeritik guru olahraga nyang maunye tinggal enak doang," kate engkong Boim, yang kelihatan seneng banget lantaran cucunye nurutin nasehatnye       

Tweet