ENAM
PAK JUPRI kagak bisa kagak bingung. Tentu aje die mesti bingung. Sebab, gak nyangka kalo rumah tangge anaknye nyang belon ada setaon, mulai diguncang gempa berskala hampir berichter richter. Tapi di satu sisi, Pak Jupri mesti fair. Jadi, kayaknye nggak keberatan ngasih jempol tanda salut, lantaran mantunye curhat ke dirinye. Kalo ke temen atawa ke keluarga Komeng, akibatnya bakalan laen.
Bisa aje mereka ngojok ngojok supaye Komeng langsung nyerein Juleha
"Kayaknye gue mesti betindak cepet, nee. Mumpung mantu gue lagi istirahat, kayaknye kagak salah deh kalo gue ke rumah si Leha. Gue kepengen tau sekarang juga ape nyang sebenernye terjadi," kate pak Jupri
Tentu aje pak Jupri ngomong sendirian. Sebab, bu Jupri lagi ke luar rumah. Tanpa ragu pak Jupri ngeluarin seluler jadulnye. Dengan seksama kirim pesen ke bokinnye.
" Say... ogud mau ke rumah si Leha. Kunci gue simpen di tempat biasa. Cuma lo jangan kaget, sebab di rumah ada mantu kite. Die lagi tidur di kamar si Juleha"
Kelar ngirim sms, pak Jupri buru buru ngeluarin motor nyang alhamdulillah, kreditannye udeh lunas, dan BPKBnya kagak pernah di sekolahin. Sebab, menurut pak Jupri, nyang pantes sekolah tuh anak anak. Bukan BPKB.
Bu Jupri melototin matanye nyang kagak belo. Lagi lagi Bu Supri ngebaca pesen di ponselnye.
"Aje gibrut... ade ape yee? Kok si Komeng lagi istirahat di rumah gue, bang Jupri malah ngeloyor ke rumah si Leha," batin bu Jupri nyang lantaran ngedadak was was lantas cuma masukin belanjaan ke keranjang, lantas buru buru ngeloyor.
Tentu aje tuh pedagang sayur nyang kaget pembelinye udeh langsung ngeloyor tanpa bayar barang belanjaan, langsung tereak manggul eh manggil bu Jupri
"Bu... bu... tunggu !"
Lantaran tereakannye kenceng, Bu Jupri nyetop langkah. Pas doski noleh ke belakang, dia kaget lantaran si pedagang sayur udeh di depan mate, dan tanpa segen numpahin keselnye
"Ibu jangan gitu, dong. Jangan giliran bawa belanjaan inget. tapi soal bayar sengaja lupa"
Bu Jupri nyang baru ngeh kalo belon bayar sayur mayur yang dibelinye, bukan kagak malu. Cuman, die buru buru ngejelasin dan ngambil duit di dompet kecilnye nyang di selipin di ketek.
Selepas minta maaf dan bayar belanjaannye, bu Supri cepet cepet ngelangkah pulang. Tentu aje atinye nggak tenang. Cuman, Bu Jupri jadi gedeg juga sama lakinye, lantaran nggak ngejelasin masalahnye. Tadinye, bu Jupri mau ngebel lakinye. Tapi, lantaran tau lakinye lagi di jalan, niatnye dibatalin.
"Ntar malah celaka kan gue juga nyang repot," kate bu Jupri nyang dididik sama pak Jupri supaye bangun disiplin ngegunain hp.
Jadi, kalo lagi di jalan lebih baik kagak ngontak atawa kagak nerima panggilan, kecuali penting banget. Itu pun harus menepi, dan berhenti. Tidak boleh sambil bawa kendaraan bertelpon ria
"Kalo udeh celaka berat, baru bilang nyesel sih percuma. Coba kalo tetep disiplin, kan nggak bakalan celaka, nggak bakal orang laen bilang kita norak." begitu kate lakinye nyang sekarang lagi di jalan, menuju rumah Juleha
Kalo akhirnye bu Supri sampai di rumah , berani nggak ye die ngebangunin mantunye buat nanye ada masalah ape ?
Bersambung.................
0 Response to "TAK AKAN KULEPASKAN (6)"
Posting Komentar