TAK AKAN KULEPASKAN 3

TIGA

      JULEHA nggak mikir panjang. Nyang ada di pikiran Juleha, lakinya ada di kantor, sama sekali kagak mikir gimane kalo lakinya justeru tidak di kantor tapi sudah di rumah. Lantaran sebatas mikirin kepentingan pribadinye, Juleha cuma nyimpulin kalo dirinye tetep sukses dalam hal nyipoain suami. Dan, terget seperti itulah yang selalu ingin dicapai oleh Juleha setiap hari.

      Makanye, kelar nge-off selulernye, Juleha bekoar.

      "Gimane friend.... hebat nggak tuh akting gue" 

      Meski usia ibu ibu yang lain jauh lebih tua dari Juleha, tak satu pun yang menganggap gaya Juleha ngelunjak lantaran begue gue. Karena serasa sudah akrab dan menyatu dalam grup, mereka malah langsung menanggapi sembari cekakakan.

     " Lu emang hebat, Ha. Pokoknye, dalem hal ini top markotop brontop, deh" kate Bu Edy nyang wajahnye lumayan jelek tapi cukup beruntung lantaran dapet laki ganteng dan berpenghasilan super lumayan.

     Bu Markonah nyang sebenernya kagak banyak omong karena termasuk anggota nyang kepaksa ikut grup supaye dianggap gaul dan inten bertetangga, tumben tumbenan mau nyerobot.

     " Kapan yee gue bisa ngikutin jejak lu. Soalnye, gue tuh pasti kesulitan kalo mau ngebohongin suami. Bukannya nggak pernah ngebohong. Soalnye, kalo sama tukang kredit gue pasti ngebohong. Tiap ditagih gue bisa bilang lagi nggak punye duit"

    " Makanye belajar sama si Leha," selak bu Sruntul yang memanfaatkan peluang buat ngangkat Juleha lantara n die punya rencana mau minjem doku.

    " Kenape gue bilang gitu. Sebab, mesti umur si Leha jauh lebih mude dari kite, tapi ilmu cipoanye tinggi. Gue tuh salut, lantaran di usienye nyang masih muda, die kagak pelit ngebagi ilmu, kagak pelit ngebagi ape aje kalo lagi punya," tambah bu Sruntul

    " Lhoo... emangnye bu Sruntul baru tau siepe Juleha," sahut Juleha nyang kayaknye makin mabuk kesuksesan, lantaran keberhasilannya ngebohongin suami dapet pujian

    " Iye... Iye... gue tau lu selalu sukses nerapin ilmu cipoa," sela bu Ani Ketimpring sembari manfaatin peluang buat ngingetin Juleha supaya bersedia keluarin duit buat beli konsumsi

    "Cuma... cepet dong keluarin dana. Kan di depan kita semue belon ada konsumsi. Jadi, nyang hari ini sukses, kayaknye wajib deh traktir kite semua"

    "Kayaknye gue bukan cuma bilang setuju, tuh," samber bu Tuminah

    "Kalo perlu, demi mendukung kesuksesan Juleha, gue siap kok ninggalin forum sejenak buat ke toko si Peyang," tambah bu Tuminah sembari nyodorin tangan ke Juleha

    "Bener nih lu mau cabut ke toko si Peyang," tanya Juleha tanpa mikir kenape dirinye nyang mesti traktir.

    "Yaaa ampuuun... gue tuh kalo udeh ngomong pasti konsekwen, Ha. Nyang penting, hari ini kan kite lebih hepi dari hari kemaren. Iye, ngga.... Iye nggak, " timpal bu Tuminah

    "Laaah iye dong.. masa sih iye ding," ibu ibu yang lain langsung mengomentari

    Tanpa ragu, Juleha nyang atinye lagi seneeeeeeeeng banget, ngeluarin dua lembar lima puluh ribuan. Tapi, sebelon nyerahin ke bu Tuminah, Juleha pesen.

    " Inget... jangan lupe beliin rokok kesayangan gue"

    "Beres, boss" kate Bu Tuminah nyang langsung nyamber duit dari tangan Juleha.

     Begitu terima doku, bu Tuminah nyang sebenernye berbodi tambun,kayak nggak kesulitan berdiri. 

     "Doain gue yee supaye selamet di perjalanan dan lancar kembali ke tempat ini," bu Tuminah nyempetin berseloroh. 

     Ibu ibu nyang ngeliat ulah Bu Tuminah spontan cekakakan.

     " Gue malah ngedoain lu digodain brondong bego," celetuk Juleha.

     Bu Tuminah nggak ngegubris celetukan Juleha. Dengan wajah berseri seri dan hati sumringah, Bu Tuminah bergegas meninggalkan ruang tamu nyang dijadikan pusat ngerumpi habis habisan.

     Juleha dan ibu ibu lainnya nyang memperhatikan kepergian bu Tuminah, serempak menarik nafas lega, setelah mereka  tak lagi melihat sosok bu Tuminah nyang "minggat" untuk membeli konsumsi. 

     "Dasar si gembrot ! Bawaannye lapeeeer aje kalo nggak ada makanan," bu Sruntul manfaatin keheningan buat ngomongin bu Tuminah, nyang dianggap menutup peluang buat minjem duit, lantaran nanti, pas die bilang minjem duit, bisa aje Juleha nolak dengan alesan duitnye udeh abis buat beli konsumsi.

          Sebenernye, bu Markonah kepengen bilang, kalo orang gembrot kayak bu Tuminah, mau nge-group lantaran bisa makan minum gratis. Cuma, baru aje kepengen ngomong, die lihat bu Tuminah udeh balik maning ke ruangan. 

         Selaen ngebatalin niat ngomongnye, tentu aje bu Markonah kaget setengah koit. Begitu juga Juleha dan ibu ibu yang laennye. Tapi, sebelum salah satu atau secara kompak mereka bertanya, bu Tuminah, dengan wajah pucat dan tubuh gemeteran langsung ngomong.

           " Di luar... di luar rumah maksud gue,  ada pak Komeng"

           " Haaaaaaaaaaaah?" 

           Semua yang lagi asyik kecipa kecipi kecipu kecopo, mendadak sontak kaget, sekaget kagetnye. Spontan terpana. Bukan lantaran ada setan yang pamit atau mau lewat. Soalnye, kalo sebelonnye mereka kaget lantaran Oklohama rusak parah dihajar Tornado. Kini atawa barusan aje, Bu Tuminah bawa kabar kalo lakinye si Juleha ada di luar rumah. 
            Kayaknye, benar benar terjadi gempa 12 SR. 
            Sungguh sangat mengejutkan.   

           "Lo serius?" Tanya Juleha nyang jantungnye serasa mau copot.

Bersambung.......

  

       

Tweet