TAK AKAN KULEPASKAN 1

SATU

      SEBENERNYE sih bukan cuman udeh lama, tapi juga udeh sering, Komeng ngedenger soal bokinnye. Malah, juga ada beberape orang nyang sengaja ngelaporin kelakuan bokinnye, Juleha. Ada nyang bilang bokinnye beginilah, begitulah. Malah ada yang sampe bilang begonolah. Pokoknye, plit komplit.. Ibarat sayur asem, bahan baku, bumbu dan cara masaknye benar benar saling ngedukung

      Sebab, kate nyang ngelapor hobi banget kalo laki ke kantor die langsung ngayap.

      Ngayapnye bukan ngelangkah ke arah positif, tapi nimbrung di markas ibu ibu yang  hobinya semakin ngetrend,  ngerumpi

     Makanye, kalo di mate lakinya, Juleha tampil sebagai pemilik setia rumahku istanaku, tapi begitu lakinye ngantor, Juleha malah ngaku sama rekan rekan dikomunitas rumpi sama sekali kagak betah di rumah

     Pokoknye, aneka pengaduan soal bokinnye, kayak aer di sungai Bengawan Solo, nyang terus mengalir deres sampe jauh.  Tau deh tuh nanti banjirnye dimane. Nyang jelas, kalo di dada Komeng yang meluap melebihi banjir cuma berbagai macam info. 

     Info soal bokinnye, nyang sehari hari - ternyata, lebih sering ada di luar rumah timbang ada di rumah. Cuman, kate orang orang, Juleha termasuk cewek nyang jago ngatur strategi.

       Giliran lakinye di rumah, bener bener bak wanita assoi makjrot. Kalem, alim dan kayak gak nyimpen lahar panas. Tapi, pas lakinye ngantor, nggak ada dua jenak, die udeh kunci pintu dan beerrrrr... langsung deh ke markas Rumani alias Rumpi Masa Kini. Bisa seharian full. Juleha afal banget die mesti pulang ke rumah jam berape.

        Jadi, sekiranye Komeng bakal pulang jam berape, Juleha tahu kalo die udeh buru buru pulang supaya pas lakinye pulang, die udeh ada di rumah, udeh nyediain makanan, kopi, air putih ples korek kuping khusus buat lakinye.

       Komeng selalu nyangka, makanan nyang dinikmati setiap sore, made in bokinnnye. Padahal, makanan jenis ape juga boleh beli di warung. Cuma sesampe di rumah, Juleha langsung memodifikasi. Artinye, die anget angetin tuh masakan. Seolah olah, emang sibuk lagi masak buat laki, Padahal, wow.. n'tu makanan assembling alias makanan boleh beli punya.
          Kadang beli di rumah makan padang
          Seringnye sih beli di warung tegang, eh, warung tegal alias warteg

          Baik yang diangetin di penggorengan maupun di panci, semua boleh beli. 

          Juleha bukan kagak mau atawa males masak. Tapi, sebenernye die emang sama sekali kagak bisa masak. Tapi kalo soal makan atawa tinggal ngembat, makanan mentah doang nyang die agak doyan. Kalo nyang udeh mateng, baru diangkat dari penggorengan juga udeh dicaplok.
          Begitulah Juleha

       Komeng kepengeeeeen banget nyadarin bokinnye. Cuman, tiap kali die mulai nyinggung karakter Juleha, dengan tangkas Juleha berkelit. Die pasti bilang, supaye lakinye kagak ngedengerin omongan orang yang ngadu, baik dengan maksud tertentu maupun dengan maksud tertentu

            "Biasanye tuh bang... orang nyang kayak gitu sebenernye ngiri sama Leha. Sebab, bininye kagak bisa masak tapi pinter ngayap. Makanye die berusahe ngejatohin Leha, berusaha ngerusak keharmonisan rumah tangga kite," kata Juleha

               Dulu, kala pertama kali menikah dan mereka tinggal di Komplek Gading retak, tentu aje Komeng percaya. Sebab, dia yakin bokinnye jujur. Cuma setelah banyak aduan, masukan, informasi dan lain lain, kepercayaan Komeng mulai nyusut sekian prosen. 

                  Sayangnye, Komeng nggak pernah bisa ngebuktiin kalo bokinnnye begini begitu dan begono. Pokoknye, Leha jago banget ngeles. Sampe minggu kemaren, Komeng belum dapetin ide cemerlang. Sehingga, die belon tau gimane caranye bisa mergokin Juleha. Nah, kalau dengan cara itu Komeng bisa ngebuktiin, mau nggak mau Komeng mesti bertindak tegas. Minimal, Komeng akan memulangkan Juleha ke orangtuanya.

                  Maksimal, tentu saja akan memutuskan tali perkawinan.

           Cuman, Komeng nggak mau bertindak drastis. Semisal bener, die kepingin ngasih peluang buat Juleha supaye die berbenah diri. Mudah mudahan aje, peluang n'tu dimanfaatin sebaik baiknya. Kan, jadi asoi kalo Juleha bisa berubah, 

                  Meski begitu, Komeng merasa sangat beruntung. Sebab, di kala die tahu kondisi bokinnye kayak nyang diceritain banyak tetangge, belum ada tanda tanda Juleha hamil. Jadi, kalau pun nantinya memvonis cerai, nggak ada yang diberatin. Lagian, buat ape mempertahankan isteri nyang kagak bener.

                  Cuma, Komeng tetap berharap Juleha berobah. Artinya, semisal die bisa mergokin Juleha dalam kondisi seperti yang dikatakan para tetangga, die nggak langsung mengambil keputusan good bye. Tapi,  mulangin ke orangtuanye supaye Juleha dididik ulang.
           Seudeh masuk camp penggojlokan ulang, Komeng bakal ngasih kesempetan ulang buat bokinnye, supaye bisa mengupgrade kelakuan. Kalo udeh di kasih kesempatan buat perbaikin prilaku tapi masih tetap kayak duren bonyok, ape boleh buat, deh.
                    "Pokoknye, kalau masih gak berobah seudeh gue kasih peluang... jangan panggil gue si Komeng," kate Komeng di depan sohib sekantor nyang pada getap ngediskusiin bokin masing masing
                       " Pasti lo langsung cerein, dong," simpul Romli.
                       "Enak aje, lu,ngomong," tukas Komeng
                 "Maksud gue, kalo masih gitu juga gue mesti ngasih kesempetan ketiga. Nah, n'tu nyang terakhir. Kalo tetap kagak berobah,, baru gue bilang good bye"

                       Romli nyang salah ngejawab cuma bisa ngegerutu
                       "Wuuuuuuu... gue kire langsung diblokir," kate Romli sembari beringsut dari kursi.

Bersambung.....

    

Tweet