CERITA HUMOR BAGIAN SATU

KEJEBAK HARAPAN
oleh : Oesman Ratmadja

KIKUK kagak pernah protes ke orangtua kenapa pas begitu lahir dikasih nama Kikuk, bukan Anjar Asrama atawa nama lain yang lebih oke dan bisa bikin langsng cewek cewek tersenopa, eh terpesona, meski wajahnya sulit dibilang ganteng lantaran emang cuma pantes dibilang pas pasan.

Kikuk juga kagak pernah protes ke nyokap bokap, yang kalo abangnya dinamain Muhamad Japra sedangkan dirinya dikasih nama Kikuk doang. 

Pokoknya, sampai ke urusan duit, Kikuk kagak pernah protes. Bukan kagak berani, tapi lantaran Kikuk kagak demen berdebat. Waktu musim sekolah, tiap hari Kikuk cuman dibekalin uang jajan goceng. Padahal abangnya pasti dikasih ceban. Kikuk cuman kasih senyuman. 

Setelah musim sekolah lewat dan Kikuk berhasil ngegondol ijazah SMU sedangkan abangnya mandeg di tengah jalan tol, Kikuk juga kagak protes kegagalan abangnye. Begitu juga waktu Kikuk bilang mau kuliah dan enyaknye malah ngejawab supaya Kikuk kagak kuliah dengan alasan duit mereka mau dipakai buat pergi haji, Kikuk malah ngedoain supaya nyak babenye jadi haji mabrur.

Kikuk berharap, Tuhan mengabulkan dan kalo nyokap bokapnya jadi haji nyang mabrur, dirinya bakalan bahagia lantaran orangtuanya bisa bersikap adil.

Nyatanya, sepulang dari Mekah nyak bokapnya tetap aje nganak emasin abangnya.

Tetap pelit.

Tetap suka ngerumpi

Tetap stabil dalam hal marah dan numpahin emosi

" Kapan mabrurnye ye nyokap sama bokap ogud," kate  Kikuk nyang pernah bertanya keseorang nyang ngerti agama tapi KIkuk kagak mau manggil ustad lantaran nyang ditanya terkenal pelit di kalangan tetangganya.

"Lhaaa... ente terus aje berdoa, dan buat urusan doa mendoa jangan bosen. Kali aje di doa ente nyang kesekian juta kali dikabulkan. Jadi, mendingan sabar dan tawakkal aje, deh"

Lantaran jawabannye kayak begitu, Kikuk kagak mau nanya lagi. Menurut Kikuk, jawaban kayak begitu sudah cukup menjelaskan kalo dirinya mesti tetap dan terus ngelola sabar.

"Sabarnye sampe kapan, bang?" Tanya Onah, bokin Kikuk nyang lama lama jadi sebel, lantaran lakinye kagak mau protes meski tau kalo abangnye udeh ngabisin modal nyang bilangnye buat dagang tapi malah abis buat ngelesin janda mude, nyang ditingal minggal lakinye lantaran kagak tahan terus terusan dirongrong 

"Nah elu maunye sampe kapan?" Kikuk balik nanya.

Tentu aje Onah kesima. Tapi, setelah nyadar die punya kesempetan ngejawab, langsung bilang kalau lakinya boleh hebat dalam bersabar, namun batesnya mesti sampe minggu depan.

Kalo sampe minggu depan mertokunye kagak minjemin duit buat bayar uang muka rumah, Kikuk mesti protes tanpa kikuk atawa jengah.

" Onah.. Onah... kite kan mesti tetep hormat sama orangtue. Nanti, semisalnye kite diprotes sama anak kite, gimane?" Kate Kikuk/

"Eh, bang... nanti kalo anak kite mau protes, silahkan. Tapi, liat dulu isi protesnye. Masuk akal apa cuman masuk ikil. Kalo masuk akal kite persilahkan, karena kite juga emang mesti diprotes sama anak, kalo salah. Nah, kalo protes nye masuk ikil, baru kite balik protes, baru kita bilangin kalo mau ngeritik nyak sama bokap, mesti ngeritik nyang ngebangun.Ngeritik nyang nyenangin kedua belah pihak, lantaran ada win win solution"

"Onah...Onah... kalo pikiran lo lagi waras, gue jadi demen nyimaknye," sahut Kikuk nyang tanpa merasa kikuk, nyolek anu bininye, maksudnye nyolek pipi tembem Onah, bukan nyolek nyang laen.

"Abang nggak usah ngerayu," protes Onah.

"Pokoknye, kalo sampe minggu depan abang tetap sabar, Onah mau langsung pulang ke rumah nyak babe" Kata Onah.

Baru kali ini Kikuk merasa kaget. Selama tiga tahun hidup sama Onah, biar denger gledeg mengge;egar, Kikuk nggak pernah kaget lantaran paham, di hujan lebat nyang bikin Jakarta banjir, kapan pun gledek bisa menggelegar.

Begitu juga kalo Onah lagi ngambek dan die numpahin emosi. Kikuk kagak mau kaget, lantaran kalo Onah emoso lantaran kagak dikasih uang belanja, mesti dianggap wajar.

"Kalo Onah doyan batu, doyan pasir, doyan tanah, gak bakalan Onah ngambek bang. Sebab, pas lapar tinggal mungutin di jalanan lantas langsung dimasak. Tapi selama kite makan nasi nyang asalnye dari beras dan beras mesti dibeli, siape nyang tahan kalo uang belanja aje kagak dikasih?" 

Sering banget Onah marah lantaran soal itu. Tapi, Kikuk kagak pernah kaget.

Kali ini, KIkuk sendiri kagak tau kenapa dia langsung kaget.

"Emangnye enak kalo udeh punye laki masih ngegelendotin nyak babe?" Kate Kikuk, nyang cepet cepet berkata dengan lembut, lantaran Kikuk merasa takut kalo bokinnye bener bener ngebuktiin omongannye.

Tapi ape jawab Onah?

"Bang... emangnye enak kalo punya laki rela tinggal di rumah kontrakan, padahal orangtue banyak duit tapi ke abang super pelit ke bang Japra baenye setengah koit"

Mau tahu kayak ape reaksi Kikuk ? Supaye nggak kikuk tunggu lanjutannye

Tweet