PANTUN BIARIN AJE

oleh : Oesman Ratmadja

Tukang sado kepaksa alih kerJA
Supaye tetep bisa nyari nafKAH
Biarin aje anggota dewan pada manJA
Kite kan dah tau mereka emang seraKAH

Bemo dah nggak nongol di JakarTA
Kondisi metromini aje dah pada bobROK
Biarin aje mereka cuma numpuk harTA
Kan kite tau cuma pade nonjolin boROK

Makanye tinggal di Pulo GaDUNG
Katanye mau bangun rumah waLET
Dulu ngotot ngegolon renovasi geDUNG 
Sekarang diem diem renovasi toiLET

Emangnye masih terus sariaWAN
Mangkanye jangan males ngobaTIN
Ngebiarin aje kelakuan anggota deWAN
Lantaran cape nanggung kesel lahir baTIN

Nyang dilupain bukan aje ilmu haYAT
Tapi juga indahnya ilmu budi pekerTI
Nyang pade bengal bukan aje wakil rakYAT
Pejabat laen juga dah kagak punya haTI

Dimane ye bisa beli tali raFIA
Kan kite mau ngiket baRANG
Biarin aje deh instansi dikuasai maFIA
Pas rakyat marah paling ngajak peRANG

Sesusah susahnye nyari doKU
Lebih susah ngerenovasi moRAL
Biarin aje jual tanda tangan laKU
Soalnye, emang sengaja diobRAL 

Tweet